Студентите од неформалната студентска организација „Студентски пленум“ повикуваат протестот, кој во 14 часот ќе почне пред Владата на Република Македонија, да биде мирен, без инциденти и без партиски и национални обележја. Револтирани, бидејќи законот беше усвоен на владината сединица без да бидат повикани на јавна дебата, ги повикуваат сите граѓани да ги поддржат и да им се придружат на масовен протест.

– Изгледа дека она што Владата го подразбира под јавна расправа е консензуален разговор на министрите и на премиерот пред камери. И покрај сите такви јавни квазидебати, свесно прекршување на законите како и целосното игнорирање на „Студентски пленум“, како и на самите универзитети, ние не се откажуваме. Драги граѓани, студенти, професори, родители, средношколци и пензионери, да не дозволиме овој монолог на Владата да продолжи. Студенти, да си го освоиме образованието назад. Ова е моментот кога треба да искажеме револт не само против лошите реформи, туку и затоа што сопствената држава без срам нè игнорира, дрско ни се потсмева и невешто нè заокружува. Да покажеме дека гласот на студентите не познава политички и национални бариери, да докажеме дека ние, студентите, колку посилно нè притискаат, толку посилни стануваме. Затоа утре сите на протест, помасовно и покреативно затоа што заедно сме посилни – вели Горан Таневски од „Студентски пленум“.

Тој додаде дека сè уште немаат добиено одговор дали е прифатено барањето на професорите и на „Студентски пленум“ до Собраниската комисија за образование, наука и спорт и до претседателот на Собранието, во кое бараат дозвола претставници од академската заедница и претставници на „Студентски пленум“ да присуствуваат на седницата на Комисијата. Од „Стуедентски пленум“ велат дека со задоволство ќе испратат свои претставници.

И по протестот студентите ќе продолжат да го искажуваат своето незадоволство и се надеваат дека масовноста ќе ги омекне ставовите на Владата.

– Ние ќе продолжиме во континуитет да го искажуваме нашето незадоволство по повод измените во законот за високо образование. Очекуваме со секој наш нареден потег Владата да ги омекне своите ставови и да ги прифати нашите барања – рече Таневски.