Студентите во Белград ги формулираа барањата на протестите против Вучиќ

Студентите во Белград, кои веќе два дена учествуваат во „протестите против диктатурата“ кои се одвиваат во најголемите градови на Србија, денеска ги поддржаа барањата на колегите од Нови Сад и додадоа уште едно – барање за ревизија на избирачкиот список и овозможување електронско гласање.

Студентите, кои своите барања ги објавија на „Фејсбук“, бараат протестите да траат до смената на членовите на Републичката изборна комисија (РИК), поради непочитување на одлуките на Уставниот суд. Бараат и разрешување на претседателката на српскиот парламент, Маја Гојковиќ, поради блокадата на работата на Народното собрание, а бараат и смена на директорот и уредникот на информативната програма на Радио-телевизија на Србија (РТС), поради „режимско известување и нерамномерна застапеност на кандидатите“.

Студентите побараа и смена на членовите на регулаторното тело за електронски медиуми (РЕМ) поради „нереагирање на повеќе стотиции прекршоци и пријави“. Дополнително, студентите од Нови Сад наведоа дека ако не им се исполнат барањата, ќе бараат вонредни парламентарни избори и дека ќе се протестира додека не бидат исполнети сите барања.

Илјадници луѓе, главно млади, незадоволни од победата на Александар Вучиќ на претседателските избори, протестираа во понеделникот и вчера во Белград, Нови Сад, Ниш, а од вчера протестите, кои се организираат преку социјалните мрежи, се проширија во уште десетина градови во Србија.