Министерот за внатрешни работи на Република Македонија, Оливер Спасовски, и неговиот колега од Чешката Република, Милан Хованец, денеска го посетија Прифатниот центар за мигранти „Винојуг“ во Гевгелија.
Министерот Спасовски изрази благодарност за помошта што Република Чешка ѝ ја дава на Република Македонија за справување со последиците од мигрантската криза.
– Сакам да им оддадам признание на македонските, чешките и на другите полицајци кои се на јужната граница на Република Македонија и кои многу помагаат во овој период за справување со мигрантската криза. Ние сме должни да обезбедиме хуман третман на мигрантите и транзит, меѓутоа, исто така, треба да обезбедиме и стабилност и безбедност на граѓаните на Република Македонија – рече министерот Спасовски.
Министерот Хованец му се заблагодари на министерот Спасовски за сè што Македонија прави во справувањето со мигрантската криза и понуди дополнителна помош од Република Чешка и од земјите од Вишеградската група за полесно справување со овој проблем.
– Чест ни е што нашите полицајци можат да помогнат заедно со вашите полицајци во решавањето на овој проблем. Разбираме дека притисокот од мигрантите ќе продолжи и ќе се засилува и разбираме дека овој притисок ќе биде голем врз Република Македонија. Сакам да истакнам дека сме свесни за ова и сме подготвени да го преземеме својот дел од одговорноста – рече Хованец.