Врнежите од снег и ветерот го намалија загадувањето на воздухот што изминатите неколку дена имаше многу високо ниво на канцерогени ПМ10-честички.
Во скопските населби Центар и Карпош, како и во Битола, Кичево и во Тетово денеска загадувањето е на високо ниво, а во Лисиче, Гази Баба, Велес и во Кочани измерено е средно ниво на загадување.
Во 13 часот, во Центар измерени се 110 микрограми ПМ10-честички на еден кубен метар, во Карпош 100 микрограми, во Лисиче 90 микрограми, во Тетово 130, во Битола 150, а во Кичево 160 микрограми, од дозволените 50 микрограми на еден кубен метар.
Пред една недела, еколошките здруженија и граѓаните на протест пред Владата поставија ултиматум до надлежните власти дека доколку не преземат конкретни мерки против загадувањето, тие на 15 јануари ќе ги блокираат загадените градови.
Дел од мерките што ги побараа еколошките здруженија се ограничување на движењето на возилата во поширокото централно градско подрачје, воведување сообраќаен режим во денови кога има енормна загаденост, забрана на движење на возила кои користат горива со понизок стандард од „еуро 4“ и дизел и намалување на цената на билетот во јавниот превоз.
