Начинот на кој владеат ВМРО-ДПМНЕ и ДУИ секако дека е една од причините на моето незадоволство, изјави за новинската агенција „Мета“, Шефик Дураки, заменик-претседател на разгранокот на ДУИ во Арачиново, кој во неделата си поднесе оставка на функцијата.
– Коалициите се резултат на волјата на мнозинството граѓани Македонци и мнозинството Албанци. Оваа практика кај нас, во Македонија, функционира како непишано правило уште од 2008 година и тоа по заслуга само на ДУИ. Поради тоа, состојбата не зависи од волјата на поединци. Но, начинот на кој владеат и како ја практикуваат власта може да се каже дека е една од причините на незадоволството – вели Дураки.
Викендот што измина, за само едно деноноќие, тројца функционери на ДУИ, Шефик Дураки, Арбен Лабеништа и Хазби Лика, поднесоа оставки, двајца од раководни места во партијата и еден од јавна функција, заменик-министер за одбрана.
Дураки, заменик-претседател на разгранокот на ДУИ во Арачиново, последен од тројцата поднесе оставка од партиските функции.
Чекорот го повлече заменик-министерот за одбрана, Арбен Лабеништа, кој се откажа и од партиските и од јавните функции. Оставка поднесе и организацискиот секретар на партијата, Хазби Лика.