Владејачката партија СДСМ останува на ставот претседателските и парламентарните избори догодина да се одржат во редовниот термин и да се одржат одвоено едни од други, додека ВМРО-ДПМНЕ бара од власта да се организираат двата изборни циклуси на еден датум. Засега нема зближување на двете партии во однос на терминот кога би се одржале изборите.
Потпретседателот на СДСМ, Фатмир Битиќи вчера во „Само интервју“ на Канал 5 телевизија изјави дека став на партијата е да се одржат редовни избори кои ќе бидат одвоени, бидејќи е соодветно да имаме полн мандат на Владата и полн мандат на Претседателот, а за термините може да се разговара.
„Нашиот став за редовните избори да бидат одвоени е принципиелен, соодветно е да имаме полн мандат на Владата и полн мандат на Претседателот еднаш засекогаш. Ставот е одвоени избори, но спремни сме да разговараме за термините во работни групи. Отворени сме за разговори. Има доволно време, ние сме спремни и не калкулираме, ниту држиме прес-конференции со пишани датуми. Несвојствено е да се има кампања за време на верски празници, на пример, сега тоа треба да го имаме предвид. Мултикултурализмот во нашата земја носи и различни моменти“, рече Битиќи.
СДСМ не го зборува сценариото за уставна криза, туку опозицијата го наметнува во јавноста веројатно размислувајќи или правејќи сценарио претседателските избори да бидат неуспешни, додаде Битиќи.
„Ако една политичка партија повика на бојкот тоа е реалноста, во спротивно нема зошто да бидат неуспешни изборите. Можеби тоа е едно сценарио кое се развива во одредени политички кулоари но не во СДСМ. Затоа што ние сме докажале дека се грижиме и за државата и интересот на државата а политичката битка е политичка и ние сме подготвени“, рече потпретседателот Битиќи.
Од ВМРО-ДПМНЕ, пак, имаат спротивставена позиција, тврдејќи дека за два изборни циклуса би се потрошиле по 10 милиони евра.
Антонијо Милошоски, пратеник и член на Извршниот комитет на ВМРО-ДПМНЕ, утрово во изјава за радио „Лидер“ вели дека има неколку причини зошто претседателските и парламентарните избори треба да се одржат на еден датум.
„Прво, економски исплатливо е да не се трошат два пати по 10 милиони евра, да се заштеди на буџет кога имате незадоволни пензионери и немате учебници во образованието. Второ, да не влезе државата во уставна криза. Минатите претседателски, цензусот на излезеност беше 46% проценти. Според последниот попис имаме 9,6% помалку резидентно население од претходниот попис и тоа за 2021 зборувам“, изјави Милошоски, додавајќи дека постои ризик дел од гласачите да не излезат на претседателските избори и да се доведеме во ситуација да имаме неизбран претседател.
Милошоски тврди дека заедничките избори ќе ја избегнеле ситуацијата да се има осуммесечен грч на институциите, бидејќи стапува на сила изборниот законик и намалена е функционалноста, набавките, дејствувањето, огласите и други надлежности на институциите.
