Алармантна е финансиската ситуација во основното и во средното образование. Училиштата во Карпош должат повеќе од еден милион евра, во Струга и во Кичево нема пари за нафта и за греење, во селата во Велес родителите не ги пуштаат учениците на настава поради нехигиена, Битола има проблеми со превозот на ученици, обвинува СДСМ.

Според партијата, има неколку причини за лошите услови во образованието. Дејан Павлески, претседател на комисијата за локална самоуправа, вели дека блок-дотациите за општините се исти, иако во меѓувреме цените на нафтата и на струјата се зголемија неколкупати, бројот на ученици во основните и во средните училишта од 2007 до 2013 година е намален за повеќе од 32.000, а бројот на наставници е зголемен за 3.000.
– Градоначалниците и советниците од ВМРО-ДМПНЕ и од ДУИ за сите овие катастрофални состојби во образованието молчат. Во меѓувреме, се трупаат долгови на училиштата, растат огромни камати, некаде се активирани и извршители. За сето ова цената ќе ја платат граѓаните на Република Македонија – вели Павлески.

СДСМ бара веднаш да се зголеми износот на блок-дотацијата за образование за 10 проценти и да се обезбедат минимум технички услови и хигиена во основните училишта во селските средини.