Американскиот државен секретар Ентони Блинкен соопшти дека САД поднела нацрт-резолуција во Советот за безбедност на Обединетите нации (ОН) за примирје во Газа, пренесува Гардијан. Блинкен вели оти резолуцијата бара „итен прекин на огнот“ и дека е врзана со ослободувањето на заложниците заробени од Хамас за време на нивниот напад врз Израел на 7 октомври.
Блинкен ја информираше јавноста за резолуцијата за време на неговата неколкудневна посета во Блискиот Исток, која започна во Саудиска Арабија, а ќе вклучува посета и во Израел.
Досега САД има поставувано вето на гласања за резолуции поврзани со примирје во регионот. Во февруари САД гласаше против резолуција поднесена од Алжир, противејќи се на тоа да е „итен“ прекин на огнот – услов кој се чини САД го прифаќа со најновата резолуција предложена од Блинкен.
Сепак, во последните неколку недели, САД има поставувано повеќе притисок врз својот партнер Израел да дозволи поголем проток на хуманитарна помош во регионот и да донесе одлуки кои ќе доведат до примирје.
„Се разбира, ние стоиме зад Израел и неговото право на самоодбрана. Истовремено, императив е да се фокусираме на цивилите кои толку страшно страдаат“, рече Блинкен.
.jpg){kind=link}