Владата на 57 седница донесе протокол за отворање на рестораните и кафулињата кој предвидува работно време од 08 до 22 часот, наспроти информациите кои претходно на прес-конференција ги изнесе министерот за економија Крешник Бектеши кој информираше дека работното време ќе биде до 20 часот.

Владата и Бектеши не беа со усогласени ставови и во однос на лицата кои можат да седат на една иста маса. Имено, според протоколот на Влада, на една маса со четири столици може да седат и да се послужуваат максимум две лица, додека на една маса со четири столици може да се послужуваат четири лица доколку се од исто семејство.

Бектеши претходно не спомена дека ако четири лица седат на една маса треба да се членови на исто семејство.

Владата информира дека се дозволува работа само на отворените делови од угостителските објекти за исхрана со послужување, кои се од три страни отворени со кровна конструкција.

„Вработените во угостителскиот објект кои послужуваат задолжително носат заштитни маски и зачестено одржуваат хигиена на раце, а се ограничува и бројот на гости, односно ќе се  послужуваат само гости кои може да седат или лица кои преку шалтер ќе подигнуваат нарачки, односно не е дозволено послужување на гости на стоење на шанк и стоечки маси,“ информираат од Влада.

Протоколот наведува дека е задолжително менаџирање на влегувањето на гостите за кое е потребно да се определи одговорно лице.

На отворениот простор за послужување на гости каде има поставено маси, потребно е растојание помеѓу столчињата, од 1,5-2 метри со соседните маси во сите правци. Протоколот дозволува максимален број од 12 лица на споени маси заедно со задолжително растојание помеѓу секој гостин од 1,5 метри.

Задолжително е поставување на дезинфекционо средство за раце на секоја маса, како и засилени внатрешни контроли на вработените лица за одржување на личната хигиена (често миење раце) во сите фази на подготовка, прием и послужување на храна од страна на одговорно лице.

„Се наложуваат засилени санитарно-хигиенски мерки, пребришување на масите со средство за дезинфекција кое делува на вируси според упатство од производителот при заминување на гостите од секоја маса, а на крајот на смената задолжително механичко чистење и дезинфекција со средство кое делува на вируси според упатство од производителот. Протоколот утврдува дека е задолжително редовно одржување на тоалетите со водење на евиденција за спроведеното чистење и со употреба на наведените дезинфекциони средства. Во тоалетите е забрането користење на сушачи за раце, а задолжително е користењето на хартиени бришачи за раце за еднократна употреба,“ информираат од Влада.

Во оваа фаза протоколот забранува организирање на прослави (свадби, родендени, крштевки и сл.).