Во организација на Амбасадата на Руската Федерација во Република Македонија и на Универзитетот „Свети Кирил и Методиј“ од Скопје, денеска во Охрид беше промовирано капиталното издание „Православна енциклопедија“, во издание на Руската православна црква.
Досега се подготвени 38 тома, а набргу следуваат и обработката под буквата „м“, односно под буквата „о“, томови во кои посебно место ќе имаат Македонија, МПЦ, Охридската архиепископија и Охрид.
Поглаварот на Македонската православна црква-Охридска архиепископија, г.г.Стефан, нагласи дека во ова грандиозно дело ќе бидат поместени и статии за Македонија, Охрид и за Македонската православна црква со што, како што рече, нашата црква ќе биде блиску до другите православни христијански цркви.
– Презентацијата на енциклопедијата е голем историски настан, кој ќе ѝ даде нови импулси на соработката помеѓу Руската Федерација и Република Македонија, меѓу Руската православна црква и Македонската православна црква-Охридска архиепископија. Слушнавме дека 38 тома се подготвени досега, а набргу ќе бидат подготвени и обработката под буквата „м“, а потоа и под буквата „о“, томови во кои посебно место ќе имаат Македонија, МПЦ, Охридската ерхиепископија и Охрид, нешто што ќе го потврди и вековното пријателство и врските помеѓу рускиот и македонскиот православен народ и, секако, нешто што ќе ја прикаже вистината за црквата во Македонија, нејзините корени, животот во овие 20 христијански векови и, секако, свое место ќе најде и актуелниот живот и статус на Македонската православна црква – истакна г.г. Стефан.
Во изработката на енциклопедијата ќе се вклучат и македонски истражувачи. Одлуката, како што беше соопштено, била донесена токму денеска во Охрид, за време на презентацијата.
Редактор ќе биде ректорот на Универзитетот „Свети Кирил и Методиј“, проф. д-р Велимир Стојковски.
Директорот на проектот „Православна енциклопедија“, Сергеј Леонидович Кравец, посочи дека гостувајќи во Македонија, целосно разбрал зошто изворите на православието на Русија се поврзани со оваа убавина овде.
– Во Русија се чувствуваат врските помеѓу нашите две држави и фактот што „Православната енциклопедија“ е донесена во Охрид и во Македонија е многу важен, особено зашто таа нема да стане само дел од библиотеката на Универзитетот „Свети Кирил и Методиј“, туку и основа за нашата идна и плодна соработка – рече Кравец.
Според него, засега се планирани сто статии за Македонија, но, како што појасни, тој план не е конечен и може да се промени.
