Премиерите на Полска, Чешка, Словачка и на Унгарија попладнево, на вонредниот самит на Вишеградската група во Прага, планираат повторно одлучно да го одбијат прераспределувањето на бегалците по обврзувачки квоти и се подготвуваат да побараат од ЕУ конечно да почне да го спроведува веќе договореното – борба против шверцерите на бегалци и контрола на надворешната шенгенска граница.
– И кога би се согласиле да ги прераспределиме бегалците според обврзувачки квоти, повеќето од нив се насочени кон развиените земји како што се Германија и Скандинавија и не сакаат да останат кај нас. Тоа нема да функционира, а за да ги задржиме, тогаш би морале да се откажеме од слободата на движење и да ги обновиме внатрешните граници во ЕУ – рече денеска чешкиот премиер Бохуслав Соботка.
Чешкиот премиер порача дека воопшто не е потребен некој нов самит на ЕУ во врска со бегалците, туку оти Европската комисија мора да почне да го спроведува мерките што ги договори во април и во јуни, исто како што инсистира на спроведување на некои нејзини неважни или помалку важни насоки.
– Веќе имавме два самита на ЕУ. Бегалската криза нема да се реши со постојано состанување во Брисел – рече Соботка.
