Со настап на ансамбли од Хрватска, Турција, Полска, Канада, Србија, Унгарија, Северен Кипар, Бугарија и од Македонија, во традиционалниот термин, од 6 до 11 јули, на отворената сцена Долни Сарај, ќе се одржи 54. по ред „ Балкански фестивал на народни песни и ора“.
– Музиката се изведува во живо, секој доаѓа со свои носии, кореографија и се внимава да нема изведување кореографија од други земји. За ансамблот „Танец“ претставува големо задоволство да се настапи на балкански фестивал. Интересот на публиката е сè поголем, еве и странци се заинтересирани за фестивалот , за настапот на „Танец“, што се покажа и минатата година, кога одбележуававме 65 години јубилеј и имавме два концерта, но и двата поминаа со голема посетеност. Секоја година внесуваме во програмата некоја нова кореографија. Сè уште размислуваме за годинава, имаме идеи да ги вратиме старите кореографии, неделава ќе се утврди дефинитивно со што ќе настапиме – вели селекторот на фестивалот и директор на „Танец“, Зоран Џорлев.