Според програмата на „Охридско лето“, вечерва во црквата „Св.Софија“ ќе настапат Клаиди Сахатчи (виолина), Мерита Реџа Тершана (пијано) и Пјетер Гураљуми (виолончело), сите од Албанија.
На програмата се дела од Волфганг Амадеус Моцарт, Цезар Франк и на Феликс Менделсон.
Пијанистката Мерита Реџа Тершана е добитник на повеќе награди, меѓу кои и наградата за најдобар изведувач на годината, која ја добива во 2009 година. Во текот на својата кариера, настапувала во повеќе земји во Европа, а значајни се и нејзините настапи на фестивалите, меѓу кои „Шлезвиг-Холштајн“ во Германија, „Брегензер фестшпиле“ во Австрија, косовскиот „Камерфест“ и други.
Виолинистот Клаиди Сахатчи во еден од најистакнатите инструменталисти на својата генерација. Бил концерт-мајстор на повеќе значајни оркестри, како Националниот оркестар на Лион, Камерниот оркестар на Цирих, Оркестарот на театарот „Ла скала“ во Милано и други, а во 2009 година го добива престижното место – прв концерт-мајстор на оркестарот „Тонхале“ од Цирих.
Виолончелистот Пјетер Гураљуми настапувал на повеќе значајни фестивали во Албанија, но и во САД, во Италија, во Австрија, во Швајцарија, во Франција и во други земји. Добитник е на повеќе награди на национални и на интернационални натпревари.
