На вчерашната средба во Министерството за транспорт и врски бил постигнат договор за согласност за решавање на барањата кои беа отворени од страна на Синдикатот на М-Нав (ССКЛ).
„Со тоа е овозможено авионскиот сообраќај да се одвива редовно. Во меѓувреме се продолжува со координациите во ресорното министерство, со цел целосно реализирање на преземените обврски од двете страни“, соопштија од Владата.
Барањата на Синдикатот на контролори за летање се: подобрување на условите за работа во Контрола за летање, застарената опрема да биде заменета со нова и да се воведе „нормална селекција на кадар потребен за вработување“.
„Го поздравуваме потпишувањето на колективниот договор и одлуката за ангажирање на консултантска фирма која професионално ќе изврши функционална анализа за подобрување на функционирањето на претпријатието. Продолжуваме со заеднички координации да работиме за целосно реализирање на превземените обврски од двете страни. Се согласивме да работиме на подигање на нивото на транспарентноста за сите прашања, се до изработката на студијата која ќе ги даде идните правци за развој на претпријатието“, велат од Министерството за транспорт и врски.
Оттаму, штрајкот ќе биде одложен, со цел давање на простор за надминување на отворените прашања.
Од Министерството за транспорт и врски велат дека заедно со менаџментот на М-Нав стојат на ставот за спроведување на барањата на Синдикатот.
Инаку, денеска од 11 до 17 часот, беше најавен штрајк без опслужување на воздушниот сообраќај на Меѓународниот аеродром Скопје и аеродромот „Св. Апостол Павле“ во Охрид. Доколку се реализираше, ќе имаше доцнење и нереализирање на летови и префрлање на патници на други аеродроми.
