На денешната седница на централниот одбор на НСДП усвоени биле четири заклучоци поврзани со политичката криза. Партијата заклучила дека за да се спречи понатамошното пропаѓање на Република Македонија на внатрешен и на надворешен план, неопходно е организирање на предвремени парламентарни избори.
„Опозицијата не смее повторно да влезе во замката на власта и да прифати датум за избори без да бидат исполнети условите за слободни и фер избори. Вообичаен редослед на активностите би бил итно исполнување на условите преку прочистување на избирачкиот список, почнување реформи во медиумите, што меѓу другото подразбира и расчистување со криминалот и на корупцијата за кои се говори во прислушуваните разговори. Од друга страна, тоа значи и обезбедување на непречена работа на СЈО и потоа консензуално утврдување на датум за избори, точно онака како што побара германскиот дипломат Јоханес Хајндл“, велат од НСДП.
Од партијата очекуваат во преговорите да се вклучат и претставници на помалите парламентарни партии од власта и од опозицијата. НСДП изрази и поддршка на условите и на барањата што ги испорачаа граѓаните преку „Шарената револуција“.
