„Средношколски пленум“ и Средношколската унија треба да разговараат како партнери и да најдат заедничко решение за излез од состојбата пред таа да ескалира со несакани последици, е ставот на Првата детска амбасада „Меѓаши“ за преставката што до нив ја испрати Средношколската унија.
„Младите можат да се сослушаат и да разговараат конструктивно, почитувајќи ги различните ставови и мислења или да заземат партиски и други позиции на „моќ“ и со заплашување да ги отфрлат барањата на другата страна. Исто така не помалку важно е да се спречи злоупотребата на овие случувања во политички цели, а особено не за партиски интереси. Правото на слобода на здружување и слобода на изразување го опфаќа во себе и правото на протестирање. Правото на мирен протест е едно од основните права на човекот, преку кое тој може да го изрази своето мислење за задоволство и за незадоволство. Вклученоста на децата во протести, преку формални или неформални здружувања, за прашања кои се од нивно значење, водат кон тоа децата да имаат директно влијание врз политички промени и креирање политики кои се однесуваат на теми од значење за нив“, се вели во одговорот на „Меѓаши“ до Средношколската унија.
Од „Меѓаши“ потсетуваат дека Република Македонија е потписник на Конвенцијата за правата на детето (КПД) и на други меѓународни документи со кои на децата им се гарантираат и правата што спаѓаат во групата на граѓански и политички права и важноста на детското, односно младинското учество особено во процесите на одлучување за прашања кои се важни за нив.