На 31 мај, во манастирот „Св. Илија“, село Витолиште, во организација и под покровителство на локалната самоуправа на Општина Прилеп, ќе се одржат 31. Мариовско-мегленски културни средби.
Со овие традиционални средби се негува фолклорното и културното наследство на регионите. На средбите ќе присуствуваат повеќе граѓани од Прилеп и од Македонија, локалното население, како и учесници со богата културно-уметничката програма. Целта и значењето на одржувањето на средбите е зближување на населението од двата региона на Мариово и на Меглен, средба на лица кои се иселиле од регионот, како и остварување на културна размена во пошироки рамки.
Покрај културно-уметничката програма, ќе се одржи и велосипедски настан со учество на велосипедисти од целата земја. Велосипедистите пристигнуваат претходниот ден и кампуваат во село Манастир, од каде ќе биде и официјалниот старт на трката в недела, на 31 мај.
Организаторите најавија тридневна забава. По пристигнувањето на гостите и по поставување на кампот, следува отварање на „Оутдор фестивал“ (Outdoor festival) со проекција на кратки филмови, изложба на фотографии, аеробик-забава со Бубало и богата музичка програма со диџеи.
Она што е особено значајно за овие средби е нивниот придонес кон развојот на руралниот туризам и промовирањето на Мариовско како вонреден потенцијал со придобивките што ги нуди чистата животна средина.
Средбата ќе заврши со традиционален заеднички ручек во манастирот „Св. Илија“. Локалната самоуправа обезбедува и организиран бесплатен превоз за граѓаните, а тргнувањето е пред „Реклами“ на Булевар, во 8 часот.
Б.Б.