Личните карти чиј рок не е истечен ќе продолжат да важат и по 12.02.2024, извести Министерството за внатрешни работи, додавајќи дека како ресорно министерство надлежно за издавање на лични документи укажува дека Законот за личната карта не е изменет.
„За таа цел, ги информираме граѓаните на Република Северна Македонија, дека личните карти со називот на државата „РЕПУБЛИКА МАКЕДОНИЈА“ кои имаат важност, односно чиј рок не е истечен, продолжуваат да важат и по 12 февруари 2024 година“, велат од МВР.
Во однос на патните исправи засега сè уште нема официјални информации, дали граѓаните на државата кои нема да успеат да извадат пасоши со новото име, „Република Северна Македонија“, ќе бидат во можност да патуваат надвор од земјата по 12 февруари годинава.
Премиерот Димитар Ковачевски информираше дека досега се издадени 1,2 милиони пасоши.
„Верувам дека ќе се продолжи со такво темпо, а ние ќе ги испитаме сите можности со цел доколку биде потребно да се направи пролонгирање во делот на пасошите, бидејќи тие им служат за граѓаните да можат да патуваат надвор од земјата“, рече Ковачевски.