Еден и пол месец премиерот Никола Груевски го нема во јавноста да отвори некоја нова инвестиција или да пресече црвена лента.
Последен пат Груевски е виден како пушта нова инвестиција на 15 март 2015 година (сабота), на почеток на изградбата на магистралниот гасовод, делница Клечовце – Блок станица 5, кој е дел од проектот за изградба на националниот гасоводен систем во Република Македонија.
Претходно, на 8 март годинава, тој пушти во употреба спортски терени во ОУ „Кузман Јосифовски Питу“.
На 28 февруари, беше и на промоција на нови наслови од проектот „Превод на 1.000 стручни и научни книги“, а еден ден претходно, на 27 февруари, пушти во употреба спортска сала во училиштето „Гоце Делчев“ во село Љубанци.
Еден од одговорите зошто го нема премиерот на вакви настани, може да биде серијата трибини што ги организира ВМРО-ДПМНЕ низ Македонија, а кои почнаа на 15 март годинава, дента кога и премиерот исчезна од јавното пуштање објекти во употреба.
