Ниту постапувањето на јавното обвинителство, ниту на најголемиот дел од сведоците кои секојдневно ги повикувате тука можат да биде предмет на политичка одговорност. Кривичната одговорност, можеби ќе ве разочарам, но не е во ваша надлежност.
Ова денеска пред собраниската Анкетна комисија формирана за случувањата на Клиниката за онкологија го порача јавниот обвинител Љубомир Јовески, кој беше повикан да зборува во Собранието.
„Јас повикав на истото во оваа сала пред само неколку дена – оставете нè да си ја работиме работата. Предметот онкологија се води темелно и стручно и ќе дојде до вистината, без разлика на некои обиди за опструкции“, рече тој пред присутните, додавајќи дека „секојдневно, дипломатски претставници, претставници на Европската Унија и на други меѓународни институции, невладини организации, ве повикуваат вас, политичарите, да не се мешате во работата на правосудството“.
Тој апелираше да престане злоупотребата на предметот онкологија во политички цели и за тоа бара поддршка од целата јавност. Со мешањето на политиката во овој случај (алудирајќи на обвинувањата од страна на лидерот на ВМРО-ДПМНЕ, Христијан Мицкоски), тој рече дека директно се загрозува постапката и валидноста на доказите, а дека паралелна истрага е недозволива.
„Со тоа се загрозува истражниот процес и се дава можност на одбраната во суд да ни ги оспорува доказите“, рече Јовески и додаде:
„Свесни сме и знаеме сите – скоро и да нема семејство, нема дом, нема човек во државава кој не поминал или лично или преку некој близок низ траумите што ги носи дијагнозата на канцер. Мојот единствен брат почина на Клиниката за онкологија пред 4 години. Во моето најблиско опкружување и сега имам пациент на таа клиника. И ова не го кажувам за да се докажувам дека и мене ми е важно да се дојде до вистината, туку затоа што знам дека дури и тој личен факт, кој не треба никого да засега, може да се злоупотреби политички за да се фрли сомнеж на непристрасноста на постапката“.
Тој повика сите кои по собраниски, партиски и други јавни настапи велат дека имаат докази за случајот, да ги достават до обвинителството.
„Секој чесен граѓанин треба доказите да не ги чува, да не се фали дека ги поседува, туку веднаш да ги даде на надлежните органи. Да не дозволиме да се компромитира постапката за политички поени“.
Тој уште еднаш нагласи дека додека трае предистрагата за можните злоупотреби на Клиниката за онкологија, детали не може да се изнесуваат.
