Во основното училиште „Јован Дучиќ“ во Нов Белград вчера мајка на петтоодделенец физички ја нападнала наставничката поради оценките на нејзиното дете. Жената била пренесена во болница, наставата била прекината, а децата пратени дома. Вработените, како што пренесува Н1, се крајно вознемирени поради, како што велат, уште еден од низата напади врз колегите.
„Инцидентот се случил за време на вториот час. Мајката на ученикот дошла на училиште и побарала да се види со професорката по биологија. Наставничката се симнала долу, а мајката на момчето прашала зошто на нејзиното дете му дале оценка 2 кога тој има просек од три“, изјавил еден од вработените, сведок на настаните во училиштето кој сакал да остане анонимен.
Како што раскажува соговорникот за Н1, наставничката по биологија ѝ рекла на мајката дека нема просечна оценка и ја повикала во канцеларијата да ѝ го покаже ова во електронскиот дневник. Кога колешката ѝ објаснила дека оценките од два семестра се собрани, мајката бурно реагирала и рекла дека ќе оди кај директорот, со што се согласила и наставничката.
„Таа ја напушти канцеларијата, потоа започна големиот одмор, но мајката се врати. Ја тресна вратата, ја повлече за коса, ја собори на подот, ѝ ја удри главата, кажуваше грди зборови, ја клоцаше додека лежеше“, изјавува соговорникот за Н1.
Таа рекла, како што вели вработена во училиштето „Јован Дучиќ“: „не знаеш којa сум јас, не знаеш со кого се плеткаш и нема жива да излезеш од училиште“.
По наредба на јавниот обвинител на Третото основно јавно обвинителство Белград, полициските службеници на ПС Нови Београд донеле решение за приведување на мајката А.Р. (32) за кривично дело злоупотреба и тортура и кривично дело загрозување на сигурноста. Неа ѝ е одредено задржување до 48 часа.
Нападната и наставничка во ОУ „Свети Сава“
Уште еден случај на насилство врз наставничка бил регистриран вчера во Белград.
Наставничка во основното училиште „Свети Сава“ од Белград, откако се вратила од рекреативна настава на Копаоник, била нападната додека се симнувала од автобус, соопшти вчера вечерта Синдикатот на просветните работници.
Како што се наведува во соопштението, наставничката била нападната и претепана од родители на ученици од друга паралелка пред очите на родителите и учениците кои се вратиле од рекреативна настава.
„Мајката на ученичката прво вербално ја нападнала наставничката заедно со нејзиниот татко, а потоа продолжила да ја влече за коса и ја соборила на земја кога татко ѝ ја удрил по глава. Цело време упатуваа закани за насилство. По пријава на еден од присутните родители, полицијата излегла на местото на настанот, извршила увид, а наставничката била пренесена во Ургентниот центар каде ѝ биле констатирани повреди на главата и истегнување на вратот“, соопштуваат од синдикатот.
Според синдикатот, полицијата ѝ наложила на наставничката да поднесе кривична пријава против родителите кои ја нападнале.
„Ваквото однесување кон просветните работници е неприфатливо и затоа бараме надлежните да ги преземат сите законски мерки против насилниците. И овој пат го поставуваме прашањето – што е со измените на Кривичниот законик, според кои напад врз вработени во образованието треба да се третира како напад врз службено лице, што наводно е усогласено со Европската комисија? Што да правиме додека не се усогласи Кривичниот законик со Европската комисија, кој ќе нè штити?“, прашува Синдикатот на просветните работници.
