Повеќе од 100 уметнички дела од познати македонски сликари, сопственост на „Пивара Скопје“, беа изложени денеска во Порта „Македонија“.
Оваа импозантна колкеција е изложена за јавноста во чест на 90-годишнината на компанијата.
– Изложувањето на овие слики е неочекувано, но природно. Направивме спој на уметничките дела од најпознатите македонски сликари и на уметноста на правење пиво. На овој начин ја покажавме страста на луѓето од компанијата кон уметноста, но и кон правење на овој наш препознатлив производ – истакна директорот на „Пивара Скопје“, Александар Ружевиќ.
Кустосот на изложбата, Мирјана Талескa, истакна дека ова е една од најбогатите приватни колекции и има исклучително значење во зачувување на македонското културното наследство.
– Овие дела имаат бесценета уметничка вредност и огромно значење за нашето културно наследство, што дава особена тежина на грижата на една компанија, како „Пивара Скопје“, и на нејзиниот напор да ја препознае оваа вредност и соодветно да вложи во нејзиното зачувување и афирмација – рече Талеска.
„Пивара Скопје“ е сопственик на 116 дела кои припаѓаат на основоположниците на македонското сликарство, сликарите од подоцнежниот период, но и на познати сликари од поранешна Југославија.
Порта „Македонија“ ќе биде домаќин на изложбата „Уметност и пиво“ на „Пивара Скопје“ за сите заинтересирани посетители во перидот од 10 јуни до 10 јули оваа година.
