ВМРО-ДПМНЕ е силно насочена кон наоѓање решенија и начин за излез од актуелната политичка криза, истакнал лидерот на владејачката партија, Никола Груевски, на средбата со пратеничката на Европскиот парламент и претседателка на неформалната група на паријатели на Македонија, Маријана Петир.
На средбата, на која разговарале за стратешките цели на државата, евроатлантските интеграции и за актуелните случувања поврзани со политичката криза, Груевски посочил дека „најсилен интерес на граѓаните е кризата наметната од СДСМ да биде што побргу надмината“.
„На тој план треба да биде почитувана и волјата на граѓаните како најсилен критериум и оценка во дејствувањето на политичките субјекти во државата“, рекол Груевски, стои во соопштението од ВМРО-ДПМНЕ за средбата.
Европратеничката Петир истакнала дека е потребно придржување на Договорот од Пржино и на преземените обврски од него и дека изборите се начинот за излез од политичката криза.
Во врска со интеграциските процеси, како што соопштуваат од ВМРО-ДПМНЕ, Груевски рекол дека стратешки интерес е членството во Европската Унија и во НАТО и дека континуирано се преземаат чекори поврзани со реформската агенда во насока на исполнување на критериумите.
