Германската амбасада во Скопје денеска соопшти дека е длабоко загрижена поради најавата на претседателот Ѓорге Иванов да ги аболира и да ги амнестира политичарите.
„Очекуваме принципот на владеење на правото да биде почитуван од сите страни. Се надеваме дека состојбата во државата и во општеството правно и политички нема да се заострува понатаму и дека јавната безбедност ќе остане сочувана. Освен тоа, Сојузната влада се надева на брзо разјаснување на правните и политички прашања, кои произлегуваат од најавата на претседателот на државата“, стои во реакцијата од Амбасадата на Германија.
Во соопштението се наведува дека работата на Специјалното јавно обвинителство мора да продолжи и оти тоа е клучно за стабилизирањето на државата.
„Од особено значење е Специјалното јавно обвинителство, како што е предвидено со Договорот од Пржино, да може непречено да ја продолжи својата исклучително важна работа за институционално стабилизирање на државниот систем, која многу се цени од голем дел од македонското општество и од меѓународната заедница. Покрај тоа, сите партии би требало да ги засилат своите напори за создавање минимум услови за избори, соодветни на европските стандарди“, стои во реакцијата.
