Аудио во форма на поткасти наречена „The Gamespot Review Cast“ е најновата додавка на сајтот за видеоигри „Gamespot“. Како што вели Џон Клис од Монти Пајтон (овојпат во сериозна варијанта) – „радиото може да успее да се врати“ и да биде успешно и во ерата на интернетот.
Овој напор на „Gamespot“, покрај рецензиите на игри ќе вклучува и дијалози помеѓу гејминг новинари за самите написи. Досега гејминг сајтовите имаа алатка „Text to Speech“ за механичко читање на текстот.
Штета е што кај нас сè уште официјално не постои добро развиен софтвер за оваа опција – чест на исклучоците програмери кои и досега вложиле иницијален напор за решавање на овој проблем – која, покрај тоа што би го унапредила новинарството за новинските агенции и сајтови, би била корисна алатка од многу причини. Една од главните е директен пристап до информации за лицата со слепило или оштетен вид, а друга причина е создавањето аудиокниги. Поткастите станаа доста популарен начин на презентирање вести и луѓе ширум светот наоѓаат начин преку тоа да заработат. По истата патека стартува и „The Gamespot Review Cast“ што изгледа вака.
Еве што велат од Gamespot, односно нивниот уредник Тамоор Хусеин:
„Откако е основан веб-сајтот на Gamespot во 1996 година, рецензиите за игри се клучен столб на покривањето нови информации на темата. Веб-сајтот разви и одржува репутација за презентирање длабински и внимателни проценки на игрите, со цел на читателите и гледачите да им се обезбедат препораки за игрите до кои треба да дојдат и да ги играат, како и анализи за импактот на гејминг индустријата на која можат да влијаат или да не влијаат самите игри“.
Секако дека овој сајт за видеоигри и гејминг новинари е еден од најдобрите и најстарите. Дури и оценките за игрите што ги нуди сајтот се еден вид на репер кај сите гејмери за тоа колку е добра или лоша дадена видеоигра.
Овие поткасти ќе можат да се најдат и на „Спотифај“ – платформа на која и македонски ентузијасти ја промовираат и негуваат македонската музика. Тамошниот „Gamespot Review Cast“ може да се најде на овој линк.
