Со многу емоции, сеќавања, но и со тага за пропаѓањето и за раскрчмувањето на најрепрезентативниот објект во Битола, помина протестот организан за враќање на Офицерскиот дом во владение на Општина Битола.
Повеќе од 1.000 битолчани синоќа се собраа пред Офицерскиот дом на Широк сокак, каде ги пречека транспарентот „Вратете ме на Битола“.
– Живееме во тешко време, во една мијазма, една зараза која се шири од арамолепци, од некадарници, неправдољубиви, од лажговци, од оние кои сакаат да ги уништат не само нашите корења, не само нашите спомени, туку и нашите животи. Зашто луѓе без корења и луѓе без спомени, не се луѓе. Овој дом е дом на културата и затоа мора да го браниме – рече битолчанката Снежана Петревска, професорка во пензија.