fbpx

Двајца македонски ученици меѓу повредените од земјотресот во Турција

-

Двајца ученици од Северна Македонија се меѓу повредените лица од земјотресот што рано изутрина го погоди југоисточниот дел на Турција. Станува збор за ученици кои преку програмата „Еразмус плус“ престојуваат во Турција, информираше Министерството за надворешни работи (МНР).

Претставништвата на МНР обезбедиле информации и стапиле во контакт со девет македонски државјани кои се наоѓаат во загрозениот регион. Се работи за осум ученици, меѓу кои се и двајцата повредени, и нивен наставник.

Едниот ученик е со потешки повреди – скршеница на која во моментов работат медицински лица и е во фаза на санирање, додека вториот ученик е со полесни повреди. Ниту еден од учениците и наставникот не е во животна опасност, информираше МНР.

„Досега нема информација за други наши државјани кои се наоѓаат во загрозена состојба, или на кои им е потребна асистенција, но нашите претставништва остануваат во континуирана комуникација како со надлежните институции на Турција, така и со наши граѓани кои се информираат и кои информираат за состојбите на терен. По инструкција на МНР, дипломат од Амбасадата во Анкара е веќе упатен во регионот за да помогне во евакуацијата на учениците од градот Караман Мараш, како и да обезбеди информација и присуство директно на терен во најзагрозените делови за евентуални дополнителни интервенции“, велат од МНР.

Министерството посочува дека македонските дипломатски претставништва во Турција се на 24-часовно располагање за сите евентуални прашања, на телефонските броеви: +905394569710 во Анкара, +905456149777 во Истанбул, и СОС телефонот на МНР во Скопје 38975273732.

Бројот на загинати од силниот земјотрес што ги погоди јужните провинции на Турција се искачи на најмалку 912 лица, додека во Сирија загинаа повеќе од 473 лица, јави ТРТ.

Земјотресот со магнитуда од 7,7 степени по Рихтер се случил утрово во 4 часот и 17 минути.

Стотици загинати во силен земјотрес што ги погоди Турција и Сирија

Амбасадата во Анкара и Конзулатот во Истанбул по силниот земјотрес во Турција достапни за информации 24 часа

Нашите вести во вашето сандаче

Секој ден во 17 ч. добивајте ги вестите од Новинската агенција Мета директно на вашата електронска адреса.

Ве молиме одберете на кој начин сакате да добивате информации од нас:
Можете да се отпишете од оваа листа преку линкот на крајот од нашите пораки.