За 13 јуни во Основниот суд во Штип е закажано рочиште за изнесување на докази, откако доверителите на штипската градежна компанија „Бетон“ побараа стечај.
Назначен е привремен стечаен управник, кој треба да даде своја оценка дали се оправдани барањата и дали треба да биде покренат стечај. Компанијата која работи близу седумдесет години беше главен изведувач на седум објекти од проектот „Скопје 2014“ со наплатени 55 милиони евра.
Некогаш успешното акционерско друштво беше преземено од дел од компаниите на Орце Камчев, кои подоцна ги продадоа своите удели. Од тогаш компанијата преживуваше, а кризата настана откако грчки „Интеркат“ го раскина договорот за градење на клиничката болница во Штип.
Грците презедоа и дел од работниците, а други заминаа во нови фирми. Директорот на „Бетон“, Ванче Мијалчев изјави дека со цел да ги заврши почнатите работи на болницата „Бетон“ зел и кредит, што сега не може да го врати, додека од „Интеркат“ им должат 1,5 милиони евра за изведени работи.
