Амбасадорот на Европската Унија во Скопје, Самуел Жбогар денеска ги додели наградите на ЕУ за истражувачко новинарство. Новинарите Снежана Лупевска Созен, Миомир Серафиновиќ и Билјана Николовска ја добија првата награда за сторијата „Крадење идентитети на граѓани за криминални цели“.
Втората награда ја доби новинарката Сашка Цветковска за сторијата „Тајните играчи од САД позади македонските ‘фејк њуз’ велешки сајтови“.
Третата новинарска награда им припадна на Кристина Озимец и Васко Маглешов за истражувачката сторија „Пратеничките скандалозни суми за патни трошоци“.
– Професиналното новинарство е од исклучително значење за демократијата, а новинарите се „најстроги набљудувачи“ на политичката елита – изјави амбасадорот на ЕУ во земјава, Самуел Жбогар за време на доделувањето на новинарските награди.
За овогодинешното доделување на наградите пристигнале 20 апликации од 23 новинари, од кои осум влегле во потесен избор. За изборот од пристигнатите новинарски трудови одлучуваше тричлена комисија од истражувачки новинари од земјава и од странство.
Наградите се дел од тековниот проект финансиран од Европската Унија „Зајакнување на квалитетното информирање и независното новинарство во Западен Балкан и Турција“.
