Фото: Glenn Carstens Peters, Unsplash

До утрово во 8 часот, преку веб-апликацијата за самопопишување се евидентирани 148.719 лица од дијаспората што се попишале, информираат од Државниот завод за статистика на нивната веб-страница за пописот. Како и досега, најголем дел од попишаните иселеници од земјава се од Швајцарија, Германија и Италија, а многу помал е бројот на попишани лица во Австралија, Канада и САД.

Министерот за правда Бојан Маричиќ денеска од Брисел ја повика македонската дијаспора масовно да се попише во периодот до 21 април преку веб-апликацијата на Државниот завод за статистика. Тој во Брисел денеска имаше средба со претставници на дијаспората, а се разговараше за претстојниот попис. Министерот ги повика сите масовно да се попишат, бидејќи ова претставува можност успешно да се заврши статистичката операција која има непроценливо големо значење за развојот на државата.

„На нашите иселеници тука во Белгија им посочив зошто е важно дијаспората масовно да се попише. Треба да имаме реална слика. Конечно има можност граѓаните да направат нешто директно за себе. Резултатите од пописот ќе бидат водилка при креирањето на сите развојни политики. Пописот ќе се одржи, а методологијата и начинот на спроведување на истиот е според највисоките светски стандарди и ЕВРОСТАТ“, потенцираше Маричиќ.

Министерот го пренесе ставот на Владата дека пописот нема да се одложи и дека тој ќе се спроведе според највисоките стандарди. Дополнително поради пандемијата ќе бидат почитувани препораките на Комисијата за заразни болести кои ги дизајнираше токму за безбедно спроведување на статистичката операција.

Претставниците на дијаспората во Белгија на разговорот со Маричиќ се интересираа за тоа како досега се одвива пописот и кога можат да се очекуваат резултатите од истиот, информираат од Министерството за правда.