Во Варшава на марш излегоа повеќе од 10.000 Полјаци, кои побараа од владата да го почитува уставот.
Тоа претставува ескалација на конфликтот на полската опозиција, уставниот суд и на претставниците на ЕУ од една и на владејачките конзервативци од друга страна.
Демонстрантите со знамиња на Полска и на ЕУ во рацете извикуваа „устав“ и ја повикаа владата да ја прифати судската пресуда која е во спротивност на законските реформи што ги иницира.
Евроскептичната партија Закон и правда се соочува со сè поголеми критики од ЕУ, САД и од организациите за заштита на човековите права откако во ноември ја презеде власта и ја зајакна контролата на медиумите и на другите институции.
Полскиот уставен суд во средата ги нарече незаконски одлуките на владата за да го зголеми бројот на судиите кои се неопходни за донесување на пресуда.