Денеска во 18 часот, пред Владата, ќе почне маршот „Ука, бука, оди си Никола“. Протестниот марш кој го организираат „Граѓаните за Македонија“, треба да заврши пред зградата во која живее премиерот Никола Груевски.
„Никола Груевски девет години владее со Македонија, притоа остварувајќи низа кривични дела и низа политички и нечовечки злодела. Земете тенџериња, капаци од тенџериња, лажици, пластични туби и други предмети што создаваат бучава и заедно да се упатиме пред домот на Никола, за да чуе и конечно да разбере дека мора да си оди“, пишува во покана за настанот на социјалната мрежа „Фејсбук“.
Во објаснувањето зошто се бара оставка од премиерот, пишува: „Девет години власт, 54 кривични дела, 30 кривични пријави, злосторничко здружување и перење пари, неовластено прислушување и тонско снимање, злоупотреба на службена положба и овластување, мачење и друго сурово, нечовечно и понижувачко постапување и казнување, прикривање кривично дело или сторител во врска со убиство, повреда на избирачко право, повреда на слободата на определување на избирачите, давање и примање поткуп“.
