Предупредувачки протест на вработените во Царинската управа, денеска најави Синдикатот на работниците од управата, правосудните органи и здруженија на граѓани на Република Македонија (УПОЗ). Причина за протестот, како што велат, е тоа што цариниците со години наназад не добивале исплата на додаток од 30 отсто на платата, за што тврдат дека им следува согласно закон и Колективниот договор.
„Видовме дека министерот за финансии си обезбеди 30 проценти покачување на плати во МФ и во други институции, меѓутоа иако вработените во Царина имаат право на овој додаток, никогаш не го добивале“, рече на денешната прес-конференција претседателот на Синдикатот на УПОЗ, Трпе Деаноски.
Тој нагласи дека, доколку нема слух за нивното барање, протестите ќе се радикализираат, а рече дека се размислува и за затворање на гранични промени.
Претседателот на Синдикатот на УПОЗ рече и дека очекуваат прием кај новиот директор на Царинската управа за да видат дали тој ќе ги сослуша нивните барања, кои не се нови и од кои тие не се откажуваат.
Протестот на цариниците, предупреди Деаноски, е прв во низата протести што ќе следуваат во наредниот период и во други институции, со што, како што рече, ќе се реализира најавуваното жешко синдикално лето.
