Непочитување на етничкиот идентитет на припадниците за заедницата на Египќаните во Охрид и во Македонија, претставува грубо кршење на Уставот на Република Македонија и на универзалните човекови права, како и на меѓународните стандради за заштита на националните малцинства.
Со ваква реакција се огласија невладините организации кои се грижат за заштита на идентитетот, човечките и малцинските права на заедницата на балканските Египќани во Македонија, по објавувањето на содржината на наводните прислушувани разговори и СМС- пораки, вчера на прес-конференција на СДСМ, во Охрид. Тоа се Здружение на балканските Египќани во Македонија, Асоцијација за интеграција на Египќаните „Птах“ и Здружение за заштита на кулутрниот идентитет на Египќаните „Изида 41/21“.
„Иако не сме изненадени, сепак сме згрозени од лицемерството и од нетолеранцијата што се забележува кон припадниците на заедницата на Египќаните, од одредени лица од врвот на ВМРО-ДПМНЕ, кои воедно се и најблиски соработници во кабинетот на актуелниот премиер на Македонија. Со овие објавени материјали уште еднаш се потврдува политичката и општествената аномалија, предрасуда и стереотип во Македонија, дека припадниците на заедницата на Египќаните се граѓани од втор или трет ред, кои не треба да уживаат никакви граѓански права и треба да бидат само брутално инструментализирани на изборните денови“, реагираат Егиќаните.
– Невладините организации кои се грижат за заштита на идентитетот, културата, човечките и малцинските права за заедницата на балканските Египќани во Македонија, ќе ја разгедат и можноста за барање кривична и граѓанска одговорност од лицето Мартин Протоѓер. Исто така, релевантините меѓународни институции и механизми за заштита на човековите и на малциските права, ќе бидат информирани за овој случај. Ги повикуваме Мартин Протоѓер, како и партијата ВМРО-ДПМНЕ, јавно да им се извинат на сите припадници на заедницата на Египќаните во Македонија, за непочитување на етничката посебност и идентитет, како и за обидот за поттикнување расна и етничка нетрперливост кон припадниците на заедницата на Египќаните – вели за „Мета“ професор д-р Рубин Земон, почесен претседател на Здружението на балканските Египќани во Македонија.