Во втората половина на 2018 година, имало неколку сериозни проблеми со јавните набавки во земјава, анализира Центар за граѓански комуникации (ЦГЦ).
Во нивниот 31. извештај за редовниот мониторинг на јавните набавки, се вели дека зачестено се спроведуваат големи тендери кои не се делат на делови, и со тоа се оневозможува конкуренција помеѓу фирмите, односно се доведува во прашање рационалното и ефикасното искористување на средствата.
Втората забелешка е дека конкуренцијата во јавните набавки во второто полугодие од 2018 година е влошена во однос на првото полугодие. Гледано на годишно ниво, во дури 32 отсто од мониторираните тендери е добиена само една понуда.
ЦГЦ посочува и дека била зголемена е примената на нетранспарентната постапка со преговарање без објавување оглас. Во 2018 година се склучени вкупно 596 договори без објавување оглас, во вредност од 33 милиони евра, што е за 4 милиони евра повеќе од 2017 година.
