Владејачката партија Алијансата за Албанците денеска побара од полицијата да открие кој се заканува на вработените и на директорот на Агенцијата за одземен имот. Ваквата реакција на партијата следи откако деновиве реагираше и директорот на оваа агенција Дритон Небиу, кој се пожали на притисоци.
„Деновиве криминалци потврдени со судски решенија им се заканувале на вработените и на директорот на Агенцијата за управување со одземен имот Дритон Небиу. Сакаме да ве известиме дека зад директорот Небиу стои целата Алијанса за Албанците, целото претседателство и сите членови. Безрезервно го поддржуваме нашиот директор кој неодамна, како никој до сега после 10 години успешно продава имот конфискуван од криминалци и корумпирани поединци“, велат од Алијанса за Албанците.
Од партијата порачаа дека ќе продолжат да продаваат одземен имот и парите од продажбата ќе им се вратат на граѓаните до последен денар.
„Јавно ги повикуваме надлежните институции, Министерството за внатрешни работи, обвинителството и другите институции да ги истражат заканите кон вработените и раководството на Дирекцијата за конкретно управување, да ги идентификуваат заканите и да ги изведат пред правдата“, порачаа денеска од оваа партија.
Инаку, во тек е постапката на Агенцијата за управување со одземен имот за продажба на станови на Сашо Мијалков, кои се лоцирани во скопската населба Водно.
На лицитација трите стана на Мијалков на Водно – се продаваат по 1.400 евра за квадрат
