Поранешниот американски претседател Доналд Трамп изјави дека нема да учествува на втората ТВ дебата пред претседателските избори во ноември, јави Би-Би-Си.
Додека заменик-претседателката Камала Харис, кандидатка на Демократската партија, ја прифати поканата за дебатата за Си-Ен-Ен на 23 октомври, републиканскиот кандидат Трамп на предизборен митинг рече дека е „предоцна“, бидејќи гласањето веќе започнало.
Тимот на кампањата на Харис рече дека со оглед на тоа што поранешниот претседател тврдеше дека победил во нивната претходна дебата во Филаделфија претходно овој месец, тој треба да прифати.
Предвремените анкети направени по таа дебата покажаа дека мнозинството гледачи веруваат дека потпретседателката го надминала својот противкандидат.
По дебатата на 10 септември, Трамп рече дека нема да има дополнителни дебати.
Говорејќи на митинг во Вилмингтон, Северна Каролина во саботата, тој рече оти победил во таа претходна пресметка и додаде оти „предоцна е“ за друга.
„Гласањето веќе започна“, рече тој, обвинувајќи ја Харис дека бара уште една спаринг рунда „бидејќи лошо губи“.
Во изјавата во саботата, претседателката на кампањата на Харис-Валц, Џен О’Мали Дилон, рече дека Американците „заслужуваат уште една можност“ да ги видат Харис и Трамп како дебатираат пред изборите во ноември.
„Би било без преседан во модерната историја да има само една изборна дебата“, рече таа. „Дебатите нудат единствена шанса за гласачите да ги видат кандидатите рамо до рамо и да направат споредба на нивните конкурентни визии за Америка“, додаде таа.
На X (поранешен Твитер), Харис напиша дека „со задоволство“ ја прифаќа поканата за дебата и се надева дека Трамп исто така ќе учествува.
Си-Ен-Ен соопшти дека потенцијалната дебата би била во истиот формат како оној што го емитуваше во јуни меѓу Трамп и претседателот Џо Бајден.
Лошиот настап на Бајден на таа средба наведе некои демократи да се запрашаат дали тој треба да биде кандидат на партијата на изборите.
По неколку недели неизвесност, претседателот објави дека нема да бара реизбор – отворајќи го патот за Харис да биде номинирана.
