Агенцијата за храна и ветеринарство (АХВ) почна итна постапка за повлекување од пазарот на потенцијално небезбедни коцки за супа од Хрватска, поради можно присуство на туѓо тело.
„Станува збор за говедска коцка за супа на производителот „Подравка“, серија 0507241, со рок на употреба до 05.07.2025 година и пилешка коцка за супа серија 0307241, со рок до 03.07.2025 година“, велат од АХВ.
Од АХВ ги повикуваат потрошувачите кои ги купиле посочените производи со овие сериски броеви, истите да не ги употребуваат, или да ги вратат на местото од каде што ги купиле, или пак да ги уништат.
Алерт нотификацијата за потенцијално небезбедните производи кои се увезени во земјава, АХВ ги добила вчера во доцните попладневни часови преку Системот за брзо предупредување за небезбедна храна и храна за животни на ЕУ.
Земја известувач е Република Хрватска, каде посочените производи се отповикани од промет.
Според информациите, станува збор за превентивно повлекување на производите, поради извесни проблеми кои настанале во процесот на производство, односно на машините.
