Скопје и денес е меѓу десетте најзагадени градови во светот, покажуваат податоците од интернет-порталот „IQAir“.
Според мерењата направени во 12 часот напладне, македонскиот главен град се наоѓа на шестото место според аерозагадување во светот. Со индекс на загадување од 173, воздухот е оценет како „нездрав“ и речиси 20 пати ја надминал горната граница која ја препорачува Светската здравствена организација (СЗО).
Главен загадувач се ПМ-2,5 честичките, чии концентрации, според „IQAir“, изнесуваат 99 микрограми на метар кубен. За споредба, горната граница поставена од СЗО е 5 микрограми на метар кубен.
Северна Македонија со својот загаден главен град, денес на листата на „IQAir“ е во друштво на Пакистан, Индија, Бангладеш, Кина, Монголија, Виетнам и Узбекистан.
Граѓаните на Скопје речиси цела недела дишат смог, а квалитетот на воздухот е на незадоволително ниво и во другите градови.
Во Струмица и Кичево и понатаму на сила се препораките и мерките против аерозагадувањето, поради пречекорениот праг на алармирање поради присуството на ПМ-10 честичките во воздухот.
