Агенцијата за аудио и аудиовизуелни медиумски услуги (ААВМУ) ги осудува заканите со тужба од страна на директорката на Националната агенција за европски образовни програми и мобилност, Лидија Димова упатени кон онлајн медиумот „А1он.мк“ поради објавување текстови поврзани со ЕУ проекти спроведувани од Агенцијата.
„Заканите за тужби, наместо со поставување аргументи или користење на правото на исправка или одговор претставуваат директен притисок врз работата на медиумите и обид за цензура. Оттаму секој вид на закани и притисоци врз новинари претставуваат загрозување на слободата на информирање и се апсолутно неприфатливи. Во ниту еден момент не треба да се заборави дека улогата на медиумите е да отвараат прашања од јавен интерес и треба да се поттикнуваат темелно и професионално да ги извршуваат своите обврски и навремено да ја информираат јавноста,“ се вели во реакцијата на Аагенцијата за аудио и аудиовизуелни медиумски услуги.
Од ААВМУ посетуваат и дека медиумските работници треба да се придржуваат до новинарските стандарди, да ги проверуваат информациите пред нивното објавување и да ги земат предвид сите релевантни извори.
Текстот е изработен во рамки на проектот „Опсерваторија на медиумските реформи“, што го спроведува Фондацијата за интернет и општество „Метаморфозис“, со финансиска поддршка на „Фондацијата Отворено општество – Македонија“.
Содржината на текстот е единствена одговорност на авторите и на ниту еден начин не може да се смета дека ги одразува гледиштата на „Фондацијата Отворено општество – Македонија“.
