Изборната програма на СДСМ, која вчера беше усвоена на конгрес на партијата, содржи и бројни економски мерки, бидејќи, како што истакна лидерот Зоран Заев, клучна цел на опозицијата е Македонија да биде земја со економски стабилна средна класа.
Дел од позначајните мерки се укинување на рамниот данок, државна помош за домашните компании, можност за основање трговски друштва со почетен капитал од едно евро, модернизација на патиштата и гасификација на домаќинствата.
Во програмата се предвидуваат следниве економски мерки:
- Праведен даночен систем. Ќе се укине рамниот данок на ВМРО-ДПМНЕ, со кој сите граѓани плаќаат данок на доход по иста даночна стапка, без разлика колкави се нивните плати, пензии и дуги приходи;
- Развој на домашните мали и средни претпријатија. Ќе се зголеми драстично државната помош за нив од 200.000 евра, на 20 до 50 милиони евра;
- Поддршка на приватниот сектор преку програми за сопствен бизнис. Ќе се креираат деловни иновативни центри во сите поголеми општини, во коишто државата ќе обезбеди деловен простор за повеќе новоосновани компании;
- Можност за основање посебен вид трговско друштво, со минимален износ на основна главнина од едно евро;
- Привлекување и на домашни, но и на реални странски инвестиции. Во првите 100 дена ќе се подготви детална анализа од вложувањата и од придобивките од процесот на привлекување странски компании;
- Вложување во 600 километри автопатишта и експресни патишта, 550 километри магистрални и регионални патишта, 1.000 километри локални патишта;
- Модернизација и проширување на железничка инфраструктура во Македонија, брза пруга Табановце – Гевгелија;
- Развој на енергетските капацитети во земјава, со што ќе се намалат трошоците за енергија во Македонија;
- Македонското сонце да биде извор на енергија за секое домаќинство;
- Природениот гас да биде достапен во цела Македонија. Со изградба на магистрални гасоводи до сите урбани средини, да се овозможи користење на природениот гас, како евтин и еколошки енергент за секого во земјава.
