Ниту дождот, ниту децибелитe што доаѓаа од концертот на Здравко Чолиќ не ги спречија синоќа во Антички театар, виолинистичкиот виртуоз Стефан Миленковиќ и „Танго компас“ да приредат незаборавно музичко доживување. Концертот го проследија повеќе илјади љубители на музиката, меѓу нив и министрите за култура, Елизабета Канчевска – Милевска, и за информатичко општество и администрација, Иво Иваноски.
Концертот, како прекрасени спој на џезот и на класичната музика Миленковиќ, потсетувајќи на култниот филм на Милчо Манчевски, едноставно го нарече „После дождот“. Охридската фестивалска публика, ја имаше привилегијата да доживее и две светски премиери, неодамна компонирани од хармоникашот Марко Хатлак.
Задоволна беше публиката, задоволни беа и изведувачите кои подарија неколку бисови, додека самиот Миленковиќ на сцената одигра едно танго, со својата, од публиката повикана партнерка. Виртуозот на виолина не заборави да упати и честитката за Илинден, Денот на Републиката.
Пред охридската публика, Миленковиќ се претстави со нов проект, танго-концерт, со тим кој првпат доаѓа на фестивалот, каде инаку тој има повеќепати гостувано како солист, со камерни состави и со македонски музичари.
Претходниот настап му беше во 2011 година, заедно со Влатко Стефановски.
Овојпат, изведувачите донесоа една лепеза, пресек на развојот на тангото, со старите, но и со модерните, современи мајстори.
– „Танго компас“ значи пулс, ритам и нешто повеќе од ритам. Тоа е нешто што е самата срж на музиката, без што музиката не би можела да постои, тоа е пулс без кој ние не би можеле да постоиме. Како платформа и тема е нешто малку пошироко од само танго-теми и затоа имаме дури и нешта кои не се нужно танго, но кои ги поврзува тој пулс – изјави Миленковиќ.
„Танго компас“ е проект на страсни љубители на танго-музиката, во кој покрај Миленковиќ, се и Марко Хатлак (хармоника), Марко Чрнчец (пијано), Лука Херман Гајзер (контрабас), а со нив како вокал настапува Ана Безјак.
