Турската полиција привела 35 лица, вклучувајќи официјални претставници на администрацијата и припадниците на полицијата, во западната провинција Измир, во операција против приврзаниците на свештеникот Фетулах Ѓулен, кој е противник на претседателот Реџеп Таип Ердоган.
Новинската агенција „Доган“ јави дека акцијата на полицијата, рано изутринава е спроведена во Измир, во рамките на операцијата против „паралелна структура“, како што се нарекуваат приврзаниците на Ѓулен во државната управа.
Приведените се под јуриздикција на државниот оддел за борба против организираниот криминал.
Турските власти на 27 октомври ја презеле управата во компании, вклучувајќи весници и телевизиски станици, кои се поврзани со Ѓулен.
Ердоган во 2013 година почна остра кампања против приврзаниците на Ѓулен, откако полицијата и обвинителите отворија истрага за корупција против него и неговите соработници. Обвинителството бара затворска казна од 34 години за исламскиот свештеник поради обид за соборување на Ердоган. Ѓулен ги отфрли ваквите обвиненија.
