Од денеска вишокот пари наместо во банка може да се инвестира и во државни обврзници


Скопје, 8 јануари, 2019 - 14:15 (META) 

Граѓаните и деловните субјекти во иднина ќе треба добро да размислат пред да одлучат дали своите заштеди ќе ги пласираат како депозити во домашните банки или пак ќе се решат да инвестираат во државни обврзници.

Почнувајќи од денеска на официјалниот пазар на Македонската берза на хартии од вредност започна тргувањето со 132 емисии на државни обврзници, со вкупна номинална вредност од 54.184.070.000 денари или 881 милион евра.

Обврзниците се издадени во денари, со годишна исплата на камата, додека главнината се исплаќа на денот на достасувањето. Каматните стапки се движат во распон од  0,9 отсто за рок на достасување од 12 месеци до 5,3 отсто за рок на достасување од 30 години. Во вкупно издадените обврзници има 74 петнаесетгодишни, а само три се со рок на достасување од триесет години.

Со оглед на тоа што обврзниците се државни хартии од вредност кои се безризични финансиски инструменти кои во име на Владата ги издава Министерството за финансии, а за да се обезбедат пари од јавноста за финансирање на буџетските потреби се поставува дилемата дали е можно државата преку обврзниците да им стане конкурент на банките.

Според најновите податоци на Народната банка, каматната стапка на вкупните депозити кај банките примени од домаќинствата, во ноември, минатата година се сведе на 1,38 отсто и забележа минимален месечен пад од 0,01 процентен поен (п.п). Гледано на годишна основа, каматната стапка на вкупните депозити од домаќинствата бележи пад од 0,09 п.п.

Каматната стапка на вкупните депозити на корпоративниот сектор, во ноември, бележи месечно зголемување од 0,05 процетни поени и изнесува 1,74 отсто.

На годишна основа, каматната стапка на вкупните депозити на корпоративниот сектор е намалена за 0,17 процетни поени.

Трендот на намалување на годишната камата на депозитите може само да придонесе во иднина дел од депозитите од банкарскиот сектор да се преселат во „штедење во обврзници“ кај кои каматната стапка во некои случаи и сега е повисока отколку кај банките.


Стотина илјади штедачи не сакаат обесштетување од пропаднатите банки


Скопје, 20 декември, 2018 - 10:08 (META) 

Фондот за осигурување депозити не може да обесштети 101.909 штедачи кои ги чувале парите во банките и штедилниците за кои во изминативе години бил отворен стечај или ликвидација. Вкупната пресметана обврска за обесштетување на штедачите во 11 банки и штедилници кои биле членки на Фондот, а потоа згаснале изнесувала 1,5 милијарди денари.

Од 1997 година до 31.12.2017 година се обесштетени вкупно 20.042 штедачи во вкупен износ од 1,3 милијарди денари што претставува 90,05 отсто исплатени обврски од Фондот за обесштетување кон штедачите. Останатите 9,95 отсто претставуваат обврска за обесштетување во вкупен износ од 151,4 милиони денари или околу 2,5 милиони евра кон 101.909 штедачи кои од лични причини не го оствариле своето право на обесштетување од Фондот.

„Анализата на структурата на овие штедачи укажува дека над 50 отсто од нив имаат поединечни депозити – предмет на обесштетување помеѓу 100 денари и 1.000 денари кои можеби поради неатрактивноста на износот и покрај бројните јавни повици за можноста да го остварат своето право на обесштетување сепак истото не го остваруваат“, велат од Фондот.

Според законската регулатива, Фондот за осигурување на депозити во случај на настанување на ризичен настан врши обесштетување до 30.000 евра во денарска противвредност по депонент, во банка, филијала на странска банка или штедилница.


Ангеловска – Бежоска: Граѓаните негуваат култура на штедење во банкарскиот сектор


Скопје, 30 октомври, 2018 - 16:43 (META) 

Имајќи ги предвид сите придобивки на штедењето, задоволство ми е што можам да констатирам дека македонските граѓани негуваат култура на штедење во банкарскиот сектор, рече денеска гувернерката на Народна банка, Анита Ангеловска-Бежоска на свеченоста по повод Светскиот ден на штедењето (31 октомври), организирана од Македонската банкарска асоцијација.

– Во последните 10 години, вкупните депозити  растат со стапка од околу осум проценти, во просек, на годишно ниво, што придонесе за зголемување на штедењето за околу 10 процентни поени на нивото од 55 проценти од домашниот бруто-производ (БДП) во 2017 година. Фактот што депозитниот раст беше остварен во услови на глобалната криза и повеќе економски и политички шокови е потврда за високата доверба на граѓаните во банкарскиот сектор, кој што во целиот период остана здрав, стабилен, високо капитализиран и ликвиден, покажувајќи висока способност за успешно справување со шокови – рече Ангеловска-Бежоска.

Таа додаде дека особено позитивен е посилниот раст на депозитите во домашна валута и забрзувањето на растот на штедењето на долг рок, што го јакне капацитетот на банките за долгорочни пласмани и поддршка на инвестициски проекти.

Гувернерката потенцираше дека и покрај позитивните трендови, видлива е потребата за натамошно зголемување на вкупното домашното штедење, што е впрочем заедничка карактеристика на земјите од Централна, Источна и Југоисточна Европа (ЦИЈЕ).

На свеченоста се обратија и министерот за финансии Драган Тевдовски и претседателот на Македонската банкарска асоцијација, Коста Митровски.


Грчките синдикати најавуваат 24-часовен штрајк на јавниот и приватниот сектор


Атина, 29 мај, 2018 - 10:38 (META) 

Најголемите грчки синдикати на вработените во јавниот и приватниот сектор за утре закажаа генерален 24-часовен штрајк, што ќе ја парализира цела Грција, јавува новинската агенција МИА.

Проблеми ќе има во авионскиот, железничкиот и бродскиот превоз, а нема да се емитуваат ниту вести и информативни емисии поради учеството на новинарите во штрајкот.

Грчките авиокомпании откажале или презакажале дел од летовите, а бродовите и возовите исто така нема да сообраќаат. Јавниот сектор нема да работи до четврток, а протести се закажани за утре во центарот на Атина.

Синдикатите ги повикуваат граѓаните да ги „обединат силите против мерките на штедење, невработеноста и прекумерните даноци“.


Штрајк на грчките морепловци и новинари


Атина, 16 мај, 2017 - 13:49 (META) 

Грчките морепловци и новинари денеска стапија во штрајк, еден ден пред големиот штрајк свикан во знак на протест поради новите мерки за штедење што Грција планира да ги воведе за кредиторите да ѝ ослободат нова транша од заемот.

За време на 48-часовниот штрајк, ќе бидат запрени траектите што возат до островите, а новинарите одржуваат еднодневен штрајк, во кој утринава прекинаа да емитуваат телевизиска и радио-програма. За утре синдикатите свикаа генерален штрајк, кој ќе ги погоди услугите во земјата, од школите и од болниците до јавниот сообраќај. Контролорите за летање најавија дека ќе се приклучат со четиричасовен прекин на работата.

Работниците во Грција протестираат поради новиот договор со грчките меѓународни доверители, според кој се воведуваат нови даноци и намалување на потрошувачката и по истекот на програмата за помош во 2018 година.
Без новите мерки, Грција би можела да не ги добие новите пари, кои ѝ се потребни да избегне банкрот во текот на летото, кога на ред доаѓаат големите рати од долгот.


НБРМ: Штедењето во април намалено во однос на март поради неизвесноста


Скопје, 10 мај, 2017 - 14:12 (META) 

Штедењето во април е намалено во однос на минатиот месец, информира Народна банка. Оттаму велат дека намалување на депозитите има и кај населението и кај претпријатијата.

„Во услови на зголемена неизвесност, поумерено е намалувањето кај депозитите на населението“, додаваат од Народна банка.

Во однос на кредитната активност, првичните податоци за април покажуваат пораст на кредитите на месечна основа, повеќе на населението отколку на компаниите.

„Во април, непосредно по неколкумесечниот пораст, ликвидноста на банките умерено се намали, главно поради сезонски повисоката побарувачка за денарска готовина на населението, која е карактеристична пред велигденските и првомајските празници. Повисоката понуда на девизи на менувачкиот пазар главно беше резултат на сезонски ефект, односно за време на велигденските празници“, се вели во извештајот на Народна банка.


НБРМ: Се зголемуваат заштедите на населението, девизните резерви се на адекватно ниво


Скопје, 15 март, 2017 - 14:36 (META) 

Податоците за штедењето на населението и склоноста за располагање со девизи покажуваат дека домашната економија се стабилизира, велат од Народна банка по одржувањето на редовната седница на комитетот за оперативна монетарна политика, на која биле разгледани состојбите во домашната економија, движењата на меѓународните и на домашните финансиски пазари и показателите за домашната економија во контекст на поставеноста на монетарната политика.

Првичните февруарски податоци упатуваат на понатамошен пораст на штедењето на населението во банкарскиот систем, со што тие се зголемуваат девет месеци последователно.

– На девизниот пазар се задржани поволните движења, при што во првите два месеца од годината, збирно, НБРМ интервенира со нето-откуп на девизи. Девизните резерви и понатаму се на адекватно ниво. Поволните остварувања се во услови кога остварувањата и оцените за стабилноста на економските фундаменти и понатаму се позитивни – велат од Народна банка.

Домашниот бруто-производ (БДП) за четвртиот квартал покажува посилен пораст на економијата во однос на претходниот квартал (2,4 отсто наспроти 2 отсто, соодветно).

Реалниот пораст на БДП за целата 2016 година изнесува 2,4 проценти и речиси и не отстапува од проекцијата на НБРМ од 2,3 проценти за 2016 година.


Грција прифати нов пакет мерки од меѓународните кредитори


Атина, 21 февруари, 2017 - 9:44 (META) 

Грција прифати нов пакет мерки кои ќе мора да ги имплементира од јануари 2019 година. Вчерашниот состанок на еврогрупата заврши без конкретен договор меѓу двете страни, но и без катастрофални последици за Грција.

Европските министри за финансии ѝ дадоа дополнително време на Грција за завршување на втората фаза од проценката на завршените реформи, што ќе овозможи да се избегнат нови проблеми за грчката влада и да се постигне договор меѓу Атина и меѓународните кредитори.

Проценката на еврогрупата е дека сè уште се далеку од договор со Грција, но претставниците на тројката ќе се вратат во Атина за да продолжат со разговорите со грчката страна. И двете страни се надеваат дека ова ќе помогне да се надминат разликите во ставовите и во барањата за наскоро да се постигне договор.

Во Грција, позитивниот аспект од вчерашниот состанок се согледува во фактот дека земјата добива дополнително време да постигне договор, како и дека кредиторите конечно настапиле со став дека треба да се стави крај на периодот на строги мерки за штедење и на рецесија и да се спроведат мерки и активности за поттикнување економски развој во државата и за поефикасно справување со високата невработеност.

Негативноста, пак, е тоа што државата ќе мора да усвои и да спроведе нови мерки за две години од сега, услов кој бил поставен од Меѓународниот монетарен фонд (ММФ) за и тој да ја продолжи финансиската помош за Грција.


СДСМ: Груевски ќе мора да објасни како толку успешно штедел и се богател


Скопје, 1 февруари, 2017 - 17:38 (META) 

Никола Груевски ќе треба да објасни како успеал да заштеди 230.000 евра, колку што официјално пријавил во најновиот aнкетен лист за имотната состојба, се вели во соопштението на СДСМ.

Во него се додава дека „додека поранешниот премиер осиромаши повеќе од 500.000 граѓани, штедел и по 10.000 евра месечно“.

„Според последните пријавени податоци лани, заштедил речиси 20.000 евра. Ова може да се види ако се споредат неговите анкетни листови од последните три години. Доколку оваа пријавена заштеда се подели на 12 месеци, тогаш излегува дека обвинетиот Груевски месечно штедел околу 1.500 евра,“ се вели во реакцијата на СДСМ.

Од оваа партија истакнуваат дека „случајно или не, висината на оваа сума е слична на сумата што поранешниот премиер ја добива како апанажа од државата, од пари на граѓаните на Македонија“.

СДСМ прашува „од што живеел тогаш Груевски кога можел да ја штеди целата плата од апанажата?“

„Сумата што за една година Груевски ја ставил на книшки е речиси 60 месечни просечни плати, односно на работник кој зема просечна месечна плата и тоа пресметана според контролираниот Државен завод за статистика (ДЗС), потребни му се цели пет години за да го заработи она што Груевски го заштедил за една година. Граѓаните знаат дека поранешниот премиер и криминалната власт во заминување изнеле и повеќе од 5 милијарди евра нивни пари по странски сметки во земјите кои важат за даночни раеви“, се вели во соопштението на СДСМ.


Народна банка ја намали основната каматна стапка од 3,75 на 3,5 проценти


Скопје, 11 јануари, 2017 - 14:43 (META) 

Народна банка ја намали каматната стапка на благајничките записи, како основна каматна стапка, од 3,75 на 3,5 проценти.

Ова било одлучено на 10 јануари кога се одржала редовна седница на Комитетот за оперативна монетарна политика, на која биле разгледани состојбите во домашната економија, движењата на меѓународните и на домашните финансиски пазари и показателите за домашната економија во контекст на поставеноста на монетарната политика.

По намалувањето во декември, ова е второ дополнително намалување за 0,25 процентни поени.

– Ваквата реакција на монетарната политика е одраз на понатамошното стабилизирање на очекувањата на економските субјекти и на порастот на структурната ликвидност на банкарскиот сектор – се вели во соопштението на Народна банка.

Каматната стапка на благајничките записи беше зголемена за 0,75 процентни поени, од 3,25 на 4 проценти на 4 мај минатата година, како реакција на Народна банка на зголемената побарувачка на девизи и на притисоците врз депозитната база на банките.

Народна банка и во текот на декември минатата година интервенира со откуп на девизи, шест месеци последователно, со релативно голем износ.

Според податоците од декември, има зголемување на штедењето на населението во банкарскиот систем.