Два македонски филма во конкуренција на филмскиот фестивал „Санденс“


Скопје, 30 ноември, 2018 - 11:40 (META) 

Два македонски филма, едниот документарен, а другиот детски и авантуристички, ќе се натпреваруваат во соодветните категории на следното издание на филмскиот фестивал „Санденс“, кој е дефинитивно најголемиот и најпрочуениот светски настан на независната филмска продукција.

Во категоријата „Долготраен документарен филм“ на фестивалот, кој ќе се одржи од 24 јануари до 3 февруари 2019 година во државата Јута во САД, во конкуренција со 11 други долгометражни документарци ќе се натпреварува македонскиот „Медена земја“.

Филмот е во режија на Љубомир Стефанов и Тамара Котевска, а продуцент и монтажер на филмот е Атанас Георгиев.

„Медена земја“ на минатогодишниот Сараевскиот филмски фестивал ја освои највредната парична награда на фестивалот, 30.000 евра од Турската национална телевизија (ТРТ).

Филмот ја раскажува приказната за Атиџе, која живее со мајка и во централна Македонија, во сосема примитивни услови и произведува мед од диви пчели, притоа почитувајќи го природниот баланс – земајќи само половина од медот за себе, а оставајќи им го другото на пчелите што го собрале.

Покрај „Медена земја“ и филмот „Ловци на вештерки“, која е македонска ко-продукција, ќе се натпреварува за награда на „Санденс 2019“, но во категоријата „Деца“.

Овој филм малцинска ко-продукција меѓу Србија и Македонија и е семејна приказна, која жанровски се движи помеѓу авантура, научна фантастика и семеен филм.

Режисер на филмот е Рашко Миљковиќ, а продуцент на филмот е „Акција Продукција“ од Србија во копродукција со „Дрим Фектори“ Македонија. Во него игра македонската актерка Јелена Јованова-Периќ, костимографи се Ирена Анастасовска и Милена Миленковиќ. Звукот го снимаше Игор Поповски, директор на фотографија е Микша Анѓелиќ а монтажер е Ѓорге Марковиќ.


Македонскиот „Види ја ти неа“ најдобар интернационален краток филм на „Санденс“


Парк Сити, 24 јануари, 2018 - 12:25 (META) 

Краткиот филм „Види ја ти неа“ во режија на Горан Столевски и продукција на Скопје Филм Студио и Црна Мачка Продукција на 34-от Филмски фестивал Санденс, најголемиот американски фестивал на независен филм, ја освои наградата Најдобар интернационален игран филм во категоријата кратки филмови. Во конкуренција за наградата беа 17 наслови од целиот свет.

„Види ја ти неа“ е приказна за младата девојка Анета, која се обидува да ги реши проблемите во семејството и училиштето вклучувајќи се во еден исклучиво машки верски ритуал, скокање по крстот за Водици.

Улогите во филмот ги толкуваат Сара Климоска, Игор Ангелов, Пируника Киселички и други. Сценарист е режисерот Столевски, кинематографер е Наум Доксевски, сценограф Влатко Чачоровски а костимограф Жаклина Крстевска.

Филмот е финансиски поддржан од Агенцијата за филм на Република Македонија.

Горан Столевски е роден во Македонија, а живее и работи на релација Австралија – Велика Британија. Своето образование го стекнал на Универзитетот во Мелбурн и Викторијанскиот колеџ за уметности во Мелбурн. Столевски веќе има реализирано над дваесет кратки филмови, прикажани и наградувани на голем број фестивали низ целиот свет.


Претставен првиот филм во виртуелна реалност


Парк Сити, 27 јануари, 2015 - 18:08 (META) 

Компанијата „Околус рифт“ на фестивалот „Санденс“ го претстави својот прв краток филм наречен „Изгубен“ (Lost), кој посетителите можат да го погледнат со помош на виртуелни очила.

Во филмот, гледачот се поставува во улога на големи роботски раце кои се наоѓаат во шума и трагаат по своето тело. Иако самата околина во која раката се движи е интерактивна, екипата која работела на филмот вели дека гледачот може да се фокусира на дејството на филмот без поголеми проблеми.

Воедно, на фестивалот е најавен и филмот „Матадор“ (Bullfighter) кој гледачот го става во улога на матадор.

Introducing Oculus Story Studio from Story Studio on Vimeo.