Утре Брисел ќе препорача отворање на преговори со Македонија


Брисел, 16 април, 2018 - 10:08 (META) 

Европската комисија повторно препорачува отворање на пристапните преговори со Македонија, а извештајот за напредокот на земјата е меѓу попозитивните во овој пакет на Брисел, кој, како што стои во извештајот, „јасно ја препознал политичката волја за напредок“, јави Радио Слободна Европа (РСЕ), чии дописници од Брисел имале увид во документот што ќе биде објавен утре во Стразбур.

Во него се предупредува дека „штетата која се правела години наназад, не може да се среди преку ноќ“, но дека земјава ја надминала длабоката политичка криза и дека структурните реформи се долг процес кој може да потрае.

Според РСЕ, во извештаите невралгични точки во сите држави од Западен Балкан остануваат владеењето на правото, организираниот криминал и корупцијата, како синоними за секоја држава во регионот. Исто така, ЕК повторно во повеќе наврати го користи изразот „заробени држави“, со забелешка дека јавната управа во државите од регионот останува слаба, и малку или воопшто нема прогрес на полето на слобода на изразување.

Како и во минатогодишните извештаи, повторно се нагласува дека билатералните спорови и понатаму се главни пречки во процесот на евроинтеграција.

За Македонија во нацрт-извештајот се нагласува дека за понатамошен напредок на државата одлучувачки фактор е задржување и продлабочување на динамиката во процесот на итни реформски приоритети. ЕК изразува подготвеност да го поддржи тој процес со примена на засилен пристап за преговарачките подрачја за судството, основните права и слободи и слободата и безбедноста на државата.


Азербејџан: Власта го затвори „Радио Слободна Европа“


Баку, 26 декември, 2014 - 13:40 (META) 

Азербејџанските власти денеска го затворија дописништвото на „Радио Слободна Европа“ во Баку. Во просториите на РСЕ, упаднале полицајци и обвинители, кои на вработените им соопштиле дека имаат судски налог за затворање на радиото.

Канцеларијата на „Радио Слободна Европа“ е затворена во петок наутро, соопшти директорот на азербејџанскиот сервис на РСЕ.

Канцеларијата на државниот обвинител соопшти дека извршил претрес поради истрага за „големо кривично дело“, но детали не се наведени.

Репортерката на РСЕ Азербејџан, Кадија Исмаилова, била притворена на почетокот на годинава, а критичарите го означија обвинението како обид за подвала.