Балканот ќе преговара за признавање на дипломите на лекарите, инженерите, архитектите…


Сараево, 7 мај, 2018 - 17:34 (META) 

Земјите од Западен Балкан наскоро треба да започнат преговори за заедничко признавање на стручните квалификации на докторите по медицина, стоматолозите, архитектите и инженерите, соопшти денеска Регионалниот совет за соработка (РСС).

Претставници на шест земји од регионот на денешниот состанок во Сараево во седиштето на РСС ја потврдија препораката, која всушност беше барање во Агендата за мобилност во рамките на повеќегодишниот акциски план за изградба на Регионален економски простор, што беше усвоен во Трст минатата година од премиерите на шесте земји од Балканот.

Крајната цел на препорачаните преговори е да се склучи спогодба за меѓусебно признавање на стручните квалификации, а со тоа би се постигнало поедноставување на добивањето дозволи за занимавање со одредена професија во земјите во регионот, изјави претставникот на РСС, Вања Урошевиќ.

Владите на шесте земји сега треба да оформат преговарачки тимови како и главен преговарач и негов заменик, со цел целиот процес да заврши до крајот на 2019 година. Покрај ова, работната група им препорача на владите да направат и заедничка база на податоци за мобилноста на стручните лица која би била компатибилна со базата на податоци на ниво на Европската Унија.


Фестивалот „Егзит“ прогласен за шампион на регионалната соработка


Сараево, 15 март, 2018 - 10:42 (META) 

Светски познатиот музички фестивал „Егзит“ (EXIT) е прогласен за шампион на регионалната соработка на Западен Балкан за 2017 година. Признанието вчеравечер во Сараево му го врачи Регионалниот совет за соработка (РСС).

Генералниот секретар на РСС, Горан Свилановиќ, врачувајќи ја наградата на основачот на „Егзит“, Душан Ковачевиќ, истакна дека „фестивалот со универзални музички содржини ги надминува културолошките, политичките и сите други разлики и ни нуди ново време и прозор кон светот на иднината во духот на толеранцијата, разбирањето и просперитетот, на што сите треба да се угледаме“.

РСС е меѓувладино оперативно тело на земјите членки од Процесот за соработка во Југоисточна Европа (SEECP), чиј основач и полноправен учесник е и Република Македонија. Ова тело со седиште во Сараево е формирано во 2008 во Софија и е наследник на поранешниот Пакт за стабилност. РСС годинава одбележува десетгодишен јубилеј.

Од минатата година со усвојувањето на Повеќегодишниот акционен план за земјите од Западен Балкан на самитот во Трст,  Советот е одговорен заедно со Европската комисија за унапредување на соработката со владите од регионот и изградба на единствен економски простор, како дел од претпристапниот процес за зачленување во Европската унија.


Свилановиќ: За пет години 1.000 борци од Западен Балкан заминале во Сирија и во Ирак


Крањ, 30 ноември, 2017 - 14:24 (META) 

Околу 1.000 лица од земјите од Западен Балкан заминале да се борат во Сирија и во Ирак од 2012 до 2017 година, од кои 300 се вратени, околу 200 се убиени, а околу 400 сè уште се на боиштата, изјави денеска генералниот секретар на Регионалниот совет за соработка (РСС), Горан Свилановиќ.

Тој, како што соопшти РСС, изјави дека темпото на заминување на граѓаните од регионот се намалило во 2015 година, а речиси во целост е запрено во средината на 2016 година.

Study Infographics

Инфографик за движењето на странските борци од Западен Балкан кои заминале на боиштата во Сирија и во Ирак во периодот од 2012 до 2017 година

– Истовремено, од цела Европска Унија околу 5.000 граѓани заминале да се борат во Сирија и во Ирак – рече Свилановиќ во обраќањето на Втората меѓународна конференција за борба против тероризмот и насилниот екстремизам во Југоисточна Европа, што се одржува денеска во Брдо кај Крањ во Словенија.

Свилановиќ додаде дека овие податоци, кои поттекнуваат од студија што наменски ја порача РСС, „нè доведуваат чекор поблиску да осмислиме што треба да се направи од училиштата до затворите за да се победат насилните идеологии кои доведуваат до ужасите на тероризмот“.

Учесниците на Конференцијата, на која има претставници на влади од Западен Балкан и на повеќе меѓународни и регионални организации и инцијативи што се занимаваат со овој проблем, ќе разговараат за моменталните трендови и предизвици во активностите на европско, регионално и на национално ниво, како и за начините на спроведување на порано договорениот принцип – „цела влада, цело општество“, во сузбивање на насилниот екстремизам.

Конференцијата ја организира Регионалниот совет за соработка заедно со Министерството за внатрешни работи на Словенија, како и со Иницијативата на Западен Балкан за борба против тероризмот и Конвенцијата за полициска соработка во Југоисточна Европа.

Првата конференција за овој проблем е одржана во ноември во Тирана. Република Македонија, како основач и активен член на Процесот за соработка во Југоисточна Европа, активно партиципира на овие собири.


Справувањето со повратниците од странските боишта ќе се дефинира на балканска конференција


Крањ, 30 ноември, 2017 - 13:36 (META) 

Заканата од повратниците од странските боишта во земјите од Западен Балкан ќе биде една од темите на денешната Втора меѓународна конференција за борба против тероризмот и насилниот екстремизам во Југоисточна Европа, што се одржува во Брдо кај Крањ, Словенија.

Претставници на влади, како и на меѓународни и регионални организации што се занимаваат со оваа тема, ќе разговараат за зајакнување на соработката и на координацијата на програмите и на активностите во борбата против тероризмот и насилниот екстремизам во Југоисточна Европа (ЈИЕ). Воедно, ќе се запознаат со студијата „Игра на трпение: проценка и одговор на заканата што ја носат странските борци повратници на Западен Балкан“, нарачана од Регионалниот совет за соработка (РСС).

Конференцијата ја организира РСС заедно со Министерството за внатрешни работи на Словенија, како и со Иницијативата на Западен Балкан за борба против тероризмот и Конвенцијата за полициска соработка во Југоисточна Европа. Учествува и Република Македонија.


Пари за проблемите на Ромите на Балканот ќе се бараат и во државните буџети и од донатори


Тирана, 10 ноември, 2017 - 13:48 (META) 

Министрите кои ја покриваат социјалната сфера во повеќе балкански држави, вклучително и на Турција, на конференција во Тирана денеска се договорија за решавање на проблемите на Ромите да се издвојуваат дополнителни средства од националните буџети, но и од други донатори.

На регионалната министерска конференција во организација на Регионалниот совет за соработка (РCC) и албанските власти, се зборуваше пред се за мерки за решавање на станбеното прашање и вработувањето на Ромите.

Република Македонија смета дека инклузијата на Ромите е дополнителна вредност во општеството и дека во таа насока има простор за дополнителни буџетски планирања – рече на конференцијата министерката за труд и социјална политика, Мила Царовска.

Таа појасни дека Министерството со Светска банка во 2018 година ќе работи на реформа на системот на социјална заштита и подобро распоредување на средствата за намалување на сиромаштијата, не само на малцинствата, туку и за сите граѓани на Република Македонија.

Генералниот секретар на РCC, Горан Свилановиќ, потсети на мега истражувањето „Балкански барометар 2017 година“, според кое 16 отсто од анкетираните големи бизнисмени на Балканот не би ги вработиле Ромите без оглед на нивната стручност, а 19 отсто не се сигурни. Освен тоа, 55 отсто од бизнисмените сметаат дека вработувањето на Ромите негативно ќе се одрази на продажбата на стоки и услуги и на работната атмосфера во претпријатието. Вакавите гледишта и ставови треба да бидат променети, истакна Свилановиќ.


Мора да се најдат начини за борба против корупцијата, нема еден ефикасен модел


Љубљана, 25 октомври, 2017 - 14:12 (META) 

Ефикасно утврдување и проценка на ризикот од корупција во јавните институции е главна тема на дводневниот регионален форум што почна денеска во главниот град на Словенија, Љубљана.

Собирот е во организација на Регионалниот совет за соработка (РСС), Регионалната антикорупциска иницијатива (РАИ), а со помош на Комисијата за спречување на корупцијата на Словенија. На собирот учествуваат претставници на министерствата за правда на владите од регионот, државните тела за спречување на корупција и претставници на невладини организации.

Раду Котики, експерт за јавна администрација и за борба пртив корупцијата при РСС, потсети на неодамна објавените резултати од истражувањето „Балкански барометар 2017“, според кои корупцијата е една од најголемите грижи на граѓаните од регионот на Балканот, бидејќи така се изјасниле дури 32 отсто од испитаниците, што е зголемување за 5 отсто во однос на претходната година.

– Не постои еден ефикасен модел кој одговора за сите средини и затоа е исклучително важно да воспоставиме форуми за меѓусебна соработка, како што е овој, да размениме искуства и да ги утврдиме начините на кои најдобро можеме да се бориме притив корупцијата – изјави Котики.

Претседателот на РАИ, Давор Дубравица, изјави дека антикорупциската иницијатива останува посветена на националните институции во регионот што се занимаваат со ова прашање и во следните две години, под капата на Регионалната програма за борба против корупцијата на Југоисточна Европа, финансирана од Австрија, а која се спроведува во соработка со Канцеларијата на Обединетите нации за борба против криминалот и корупцијата УНОДЦ.

Една од главните активности во рамките на Стратегијата „Југоисточна Европа 2020“, усвоена на самитот во Трст годинава, е воведување на јасни и транспарентни правила за пристап до јавните услуги, со што треба да се зголеми интегиртетот на јавните институции. Во тој контекст, во изминатите години во регионот се подобрени проценките за ризик од корупција и проценките на квалитетот на законските прописи што се однесуваат на корупција, соопшти РСС.


Земјите од Балканот треба да ги унапредат буџетските политики за интеграција на Ромите


Белград, 21 септември, 2017 - 18:04 (META) 

Земјите од Југоисточна Европа, посебно земјите кои имаат аспирации за членство во Европската Унија треба да ги стандардизираат и унапредат буџетските политики за интеграција на Ромите во нивните општества.

Ова, на денешниот состанок во Белград, е детектирано како една од главните цели на која во претстојниот период треба да се фокусира Акцискиот тим на Регионалниот совет за соработка (РCC), како и националните координатори во земјите кои се членки на Процесот за соработка во Југоисточна Европа (SEECP).

– Забележавме позитивни исчекори во областа на образованието, а особено во промоцијата на претшколското образование – изјави Орхан Усеин, шеф на Акцискиот тим на проектот „Интеграција на Ромите 2020“.

Тој меѓутоа, како што соопшти РCC, предупреди на сè уште постоечката омраза и дискриминација.

– Во образованието преовладува дискриминацијата, а кривичните дела сторени од омраза, како и говорот на омраза се во пораст, за што сведочат невладините организации – посочи Усеин.

Претставник од Генералната дирекција на Европската комисија за добрососедство и проширување ги потсети учесниците дека ја имаат целосната поддршка, но и дека имаат обврски што треба да се исполнат.

– Одржливиот напредок во интеграцијата на Ромите е важен дел од подготовките за пристапување во Европската Унија – изјавил Мортен Јунг на состанокот на Акцискиот совет и на националните координатори за овој проект, претставници на владите на членките на СЕЕЦП, меѓу кои е и Република Македонија.

Целта на проектот „Интеграција на Ромите 2020“ што го спроведуваат РCC, Фондацијата Отворено општество и ЕУ, е да се намали социо-економскиот јаз помеѓу ромското и неромското население во земјите од Западен Балкан и во Турција.


Свилановиќ: Прогресот на соработката на Балканот е видлив и покрај осцилациите


Дубровник, 29 јуни, 2017 - 20:35 (META) 

Прогресот во регионалната соработка на Балканот и во Југоисточна Европа е видлив и покрај пречките и осцилациите што се создаваа повремено на националните и на политичките сцени, оцени денеска генералниот секретар на Регионалниот совет за соработка (РСС), Горан Свилановиќ.

Оценката доаѓа само еден ден пред состанокот на шефовите на дипломатиите и самитот на шефовите на држави или влади на Процесот за соработка во Југоисточна Европа – СЕЕЦП (SEECP).

„Видлив напредок е постигнат во унапредувањето на трговијата и на инвестициските интеграции, на дефинирање на ефикасните политики за вработување, на засилување на соработката на полето на образованието, истражувањата и иновациите, на доброто владеење и на полето на соработка во областа на безбедноста“, рече Свилановиќ, зборувајќи на годишната средба на РСС во Дубровник.

Тој додаде дека иако регионалните предизвици и осцилациите на националните политички сцени понекогаш го попречуваа Регионалниот совет за соработка, она што влева надеж е напредокот кој е видлив во поглед на продлабочување на економската соработка, на силно управување и на стабилност во самиот регион.

Денеска беше поднесен неговиот годишен извештај за работата на РСС, меѓувладино оперативно тело на СЕЕЦП, кој беше одобрен од поканетите учесници на годишниот собир. Се очекува негово одобрување и усвојување и од земјите-членки на Процесот за соработка во Југоисточна Европа, кои утре и задутре на највисоко ниво ќе се состанат исто така во Дубровник.

Република Македонија е основач и полноправен член на СЕЕЦП и активно партиципира во активностите во регионот, што ги координира РСС.


Свилановиќ: Борбата против екстремизмот да се вгради во образованието


Загреб, 25 мај, 2017 - 16:11 (META) 

„Спречувањето на екстремизмот треба да биде вграден во наставните планови и програми на општиот образовен систем, но и надвор од наставните активности“, изјави денеска генералниот секретар на Регионалниот совет за соработка (РСС), Горан Свилановиќ.

– Младите се примарна цел на пропагандата на насилните екстремисти и за да станат поотпорни треба да се направат посебни координирани програми – појасни Свилановиќ, зборувајќи на собир во Загреб на кој присуствуваат претставници на министерствата за образование, наставници и експерти од земјите од Западен Балкан, меѓу кои и од Македонија.

На состанокот, како што соопшти РСС, се разговарало и за начинот како во наставата да се интегрира образованието за толеранција во општеството. Станува збор за наставни планови во основно и средно образование, но и надвор од наставни активности.

РСС, кој е меѓувладино оперативно тело на земјите од Процесот за соработка во ЈИЕ – (SEECP), веќе има воспоставено функционален систем, односно Група на национални контакт-точки за спречување и сузбивање на насилниот екстремизам и регрутирање на терористи.

Денешниот собир е само проширување на координираните активности околу ова прашање меѓу земјите од Западен Балкан.


Укажувачите на корупција на Балканот ги сакаат малку, а во Македонија – најмалку


Сараево, 18 април, 2017 - 13:25 (META) 

Укажувачите на криминал и на корупција (whistleblowers) не се популарни, односно ја немаат поддршката ниту од граѓаните во земјите од Западен Балкан, а најмалку во Македонија, покажува истражувањето спроведено во седум земји, врз 7.000 испитаници, поддржано од Регионалниот совет за соработка (РСС) со седиште во Сараево.

Истражувањето, кое е прво од ваков вид, е спроведено во Албанија, Босна и Херцеговина, Косово, Македонија, Србија, Хрватска и во Црна Гора. Резултатите покажуваат дека само нешто повеќе од половина од граѓаните ги подржуваат укажувачите.

Во просек, секој шести граѓанин од земјите од регионот мисли дека укажувачите треба да се казнат, а во Македонија дури секој трет испитаник смета дека укажувањето на корупција и на криминал е неприфатливо и таквите лица заслужуваат казна.

Македонија, иако има еден од најсеопфатните закони за заштита на укажувачитево  споредба со земјите од регионот, има најмала поддршка за нив. Само 41,4 отсто од граѓаните сметаат дека укажувањето на корупција и на криминал е прифатливо, додека 30,4 отсто сметаат дека тие лица треба да бидат казнети, дури и ако откриваат сериозни неправилности. Нешто повеќе од 28 отсто не знаеле или не сакале да одговорат на прашањето.

На ниво на компании или организации и институции, поддршката е уште помала. Само 36 отсто сметаат дека се чувствуваат повикани да пријават ако увидат криминал или корупција, што е далеку под просекот во регионот, покажало истражувањето.

Од РСС нотираат дека анализата покажува дискрепанца помеѓу високата загриженост за состојбите со криминалот и со корупцијата во земјите од Западен Балкан и релативно слабата поддршка за укажувачите на ваквите појави.

– Корупцијата и неефикасноста за нејзиното решавање и понатаму се причина за голема загрижност во општествата во Југоисточна Европа, но, како што покажа истражувањето, тоа сè уште не се трансформирало во поддршка на јавноста кон укажувачите – вели експертот за реформа на јавната администрација и борба против корупција при РСС, Раду Котику.

Тој вели дека укажувањето се смета за една од најефикасните алатки за борба против корупцијата. Организациите како што се Советот на Европа или Канцеларијата на Обединетите нации за борба против наркотици и криминал имаат подготвено меѓународни стандарди за оваа област, додека повеќето од земјите од Југоисточна Европа веќе имаат донесени и закони за заштита на укажувачите.