Во Белград програмер убил колега, ранил двајца, па се разнел со бомба


Скопје, 12 март, 2018 - 17:03 (META) 

Младиот програмер Небојша С. (30) денеска во Белград убил свој поранешен колега и ранил двајца, по што се разнел со бомба, јавија српските медиуми.

Убиецот пред неколку дена добил отказ во софтверската фирма „Стопански советник за информациски технологии“, а денеска се вратил таму, прво ја поздравил колешката и ладнокрвно се качил на катот. Потоа влегол во една канцеларија каде имало состанок, па директно во глава застрелал еден колега, продолжил да пука, при што ранил уште еден маж, а еден од вработените за да се спаси скокнал од прозорец од висина од седум метри, при што задобил тешки повреди. Кога ги слушнале истрелите, другите вработени се заклучиле во своите канцеларии.

Потоа убиецот се вратил во својот стан, кој е блиску до фирмата чие седиште е на улицата Рузвелтова, па се обидел да се самоубие со рачна бомба која ја активирал. Полицијата го пронашла и тој бил пренесен на ургентен центар за реанимација. Во експлозијата е направена штета на неговиот стан.


МВР му даде отказ на Ален Зекиров, поранешниот телохранител на Мијалков


Скопје, 27 јануари, 2018 - 19:24 (META) 

Ален Зекиров, поранешен телохранител на екс директорот на Управата за безбедност и контраразузнавање (УБК), Сашо Мијалков добил отказ од Министерството за внатрешни работи.

Зекиров отказното решение го добил пред три дена од УБК, каде од 2015 година работи во одделот за антитероризам.

Од МВР ја потврдија информацијата.

„По спроведената постапка за утврдување на дисциплинска одговорност поради кршење на работниот ред и дисциплина, на предлог на Комисијата за утврдување дисциплинска одговорност во Управата за безбедност и контраразузнавање, од страна на министерот за внатрешни работи е донесено решение со кое на А.З. му е откажан договорот за вработување во министерството за внатрешни работи“, велат од МВР.

Дел од медиумите наведуваат дека Зекиров отказот го добил поради учеството во насилствата во Собранието од 27 април, минатата година, но од МВР нема официјална потврда на овие информации.


Поради уцена притворен државниот секретар за транспорт на Романија


Букурешт, 14 ноември, 2017 - 10:08 (META) 

Обвинителите од Националната антикорупциска управа на Романија, вчера под обвинување за уцена го притворија Нинел Церцел, државен секретар во Министерството за транспорт на Романија.

Случајот на антикорупционерите е поврзан со  инцидент од 31 октомври годинава, кога во еден од вагоните на воз натоварен со амониум нитрат избил мал пожар, а Министерството за транспорт и националната компанија ЦФР Марфа не го третирале случајот како сериозен инцидент, велат обвинителите.

Следниот ден Церцел побарал од менаџерот на Центарот за транспорт за зоната Брашов да си даде оставка ако не сака да биде отпуштен, иако инцидентот со возот не се случил на територија под негова надлежност. Државниот секретар за транспорт на менаџерот му рекол и дека ако си даде оставка, нема да се поведе дисциплинска постапка против него, а ќе стане советник во Советот на општина Брашов и подоцна пак ќе добие работно место во компанијата ЦФР Марфа. Но, менаџерот не го прифатил тоа и пријавил.

Церцел сега е во 30-дневен притвор, а премиерот Михај Тудосе го разреши од функцијата.


Отпуштен главниот стратег во Белата Куќа, Стив Бенон


Вашингтон, 18 август, 2017 - 20:53 (META) 

Претседателот на САД Доналд Трамп, на виши владини претставници им соопштил дека донел одлука да го отпушти својот главен стратег, Стив Бенон, кој уште од првите денови на оваа администрацијата важеше за негов најконтроверзен советник, јави „Гласот на Америка“.

Во соопштението од портпаролката на Белата куќа Сара Сандерс, се вели дека шефот на кабинетот на претседателот на САД Џон Кели и Стив Бенон, постигнале согласност дека денеска ќе биде неговиот последен работен ден. Сандерс додаде дека Белата куќа е благодарна за службата на Бенон и му посакува се најдобро.

Бенон, кому му се придава заслуга Трамп да биде избран на функцијата, со месеци имал несогласувања со влијателни фигури во Белата куќа.

Според весникот „Њујорк тајмс“, тој инсистирал дека повлекувањето од функцијата е негова идеја, и ја поднел неговата оставка до претседателот уште пред 11 дена, како подготовка тоа да биде објавено на почетокот на оваа недела. Веста била одложена, заради насилните протести во Шарлотсвил, Вирџинија.


Уште еден отказ во администрацијата на Трамп


Вашингтон, 3 август, 2017 - 13:56 (META) 

Високиот претставник на американскиот Совет за национална безбедност, Езра Коен-Ватник, е последниот во низата претставници на администрацијата на Доналд Трамп што доби отказ.

Белата куќа соопшти дека советникот за национална безбедност на американскиот претседател Херберт Мекмастер „ја цени добрата работа која е постигната на одделот за разузнавачки работи, под раководство на Езра Коен“. Како што се наведува, Мекмастер утврдил дека во моментов е потребен поинаков спектар на искуство за спроведување на понатамошната работа.

Во САД вчера беше потврден изборот на Кристофер Вреј за нов шеф на ФБИ, откако од функцијата ненадејно беше сменет Џејмс Коми поради улогата во истрагата за наводното руско мешање во претседателските избори во САД.


Трамп го отпушти директорот на ФБИ, Џејмс Коми


Вашингтон, 10 мај, 2017 - 10:30 (META) 

Претседателот на САД, Доналд Трамп, го смени директорот на ФБИ, Џејмс Коми, соопшти Белата куќа.

Коми беше на чело на истрагата за наводната вмешаност на Русија во американските претседателски избори.

– Претседателот го прифати предлогот на државниот обвинител Џеф Сешонс, за разрешување на директорот на ФБИ, Џејмс Коми – изјави портпаролот на Белата куќа, Шон Спајсер.

Во соопштението на Белата куќа се наведува дека потрагата по нов директор на ФБИ ќе почне веднаш.

Коми, кој беше поставен за директор на ФБИ за време на администрацијата на Барак Обама во 2013 година, со десетгодишен мандат, жестоко ја критикуваше администрацијата на Трамп поради истрагата водена против Хилари Клинтон поради користење на приватни меилови додека беше на местото државен секретар.

Во писмото упатено до Коми, Трамп го известил дека одлуката за смена стапува на сила веднаш.
„Иако многу го ценам тоа што во три одвоени пригоди ме известивте дека не сум под истрага, сепак се согласувам со оценката на Министерството за правда дека Вие не сте во состојба ефикасно да го водите ФБИ“, се наведува во писмото на Трамп.

Демократската кандидатка за претседател на САД, Хилари Клинтон, претходно го обвини Коми дека ги упропастил нејзините шанси да дојде на чело на државата со тоа што објави дека е обновена истрагата за нејзиниот начин за користење електронска пошта.

По отпуштањето на Коми, привремен директор на ФБИ ќе биде Ендрју Мекејб.


Словенечки владин функционер разрешен поради неодговорени новинарски прашања


Љубљана, 22 февруари, 2017 - 18:00 (META) 

Словенечки владин функционер бил разрешен бидејќи не одговорил на новинарски прашања што му биле поставени во интервју.

Имено, словенечката влада го разрешила шефот на секторот за обновлива енергија, Тилен Смолникар, еден ден по засрамувачкото интервју со новинарката Леа Мајцен, во кое се гледа дека тој нема основни познавања за својата работа.

Во обидот на Мајцен да го интервјуира Смолникар, на 16 февруари, по прес-конфереција на Министерството за инфраструктура во Брдо крај Крањ, тој покажал очигледен недостиг од знаење за основните податоци поврзани со неговата работа. Новинарката се обидела да му постави десетина прашања поврзани со владините трошоци и расходи за обновлива енергија и за ветерници, на кои тој не можел да одговори.

Во интервју за хрватската телевизија РТЛ, Мајцен подоцна изјави дека медиумот за кој работи одлучил да го објави интервјуто, бидејќи било очигледно дека државен функционер нема основни познавања, а словенечките даночни обврзници му обезбедуваат плата од 2.600 евра.

Инаку, Мајцен е помлада телевизиска новинарка, која пред шест месеци почнала да работи за „Канал А“.


Заплашување гласачи и нетранспарентност на ДИК констатираше ОБСЕ во извештајот


Варшава, 8 јули, 2016 - 21:03 (META) 

Заплашување гласачи, нетранспарентно работење на ДИК, комплексен процес на ажурирање на избирачкиот список и неизбалансирано известување на дел од медимите е констатирано во финалниот извештај на набљудувачката мисија на ОБСЕ/ОДИХР за одложените избори за 5 јуни.

Во извештајот, кој е објавен денеска, се вели дека иако биле преземени мерки да се спречат заплашувања и притисоци врз гласачите, многу од соговорниците на мисијата изразувале страв.

– Некои од нив тоа го припишуваа на страв од одмазда што постои во државните компании и институции. Мисијата на ОБСЕ/ОДИХР прими веродостојни тврдења за притисоци врз вработените во јавниот сектор да присуствуваат на контрадемонстрации, вклучувајќи закани за отказ. Ова отвори прашања околу правото на гласачите слободно да го дадат својот глас без страв од одмазда – се вели во извештајот.

Во однос на работата на Државната изборна комисија (ДИК), се наведува дека оваа институција работела во многу тензична атмосфера.

– ДИК успеа да ги исполни административните крајни рокови и одржуваше редовни состаноци. И покрај правната обврска состаноците да бидат јавни, ДИК редовно одржуваше работни сесии затворени за јавноста – се додава во извештајот.

Според ОБСЕ/ОДИХР, процесот на ажурирање на избирачкиот список се покажал како комплексен, методолошки предизвикувачки и што бара многу ресурси.

Набљудувачката мисија на ОБСЕ/ОДИХР почна со работа на 31 март, а прекина на 1 јуни по одложувањето на изборите на 5 јуни.


Новинарка од „Сител“ отпуштена поради колумна за Јанкулоска


Скопје, 11 март, 2016 - 15:37 (META) 

Новинарката Кристина Атовска, која работеше во утринската програма на телевизијата „Сител“, на 8 март била отпуштена од работа поради критичка колумна за поранешната министерка Гордана Јанкулоска.

Колумната ја објавила на порталот „Позитив.мк“, a два дена по објавувањето била викната од уредникот, кој ѝ соопштил дека веќе нема да работи во телевизијата „Сител“.

– Ме викна уредникот и директно ми кажа дека колумната под наслов „Новинарскиот имунитет на Јанкулоска“ ми направила проблем и поради неа ќе мора да ми го прекинат ангажманот. Не можам да шпекулирам по чија наредба бев отпуштена – рече Атовска.

Таа вели дека секогаш професионално ги извршувала задачите и дека ја почитувала уредувачката политика на „Сител“.

Атовска се обратила до ССНМ, а претседателката Тамара Чаусидис рече дека веќе подолго време Синдикатот предупредува на вакви притисоци и закани кон новинарите и ретки се ситуациите кога зад своето мислење новинарот стои со име и со презиме.

– Би сакала да укажам и јавно ја повикувам телевизија „Сител“ да ја препознае вредноста во имањето во своите редови новинарски имиња со интегритет, што не се срамат да го искажат своето мислење, што знаат да ги артикулираат своите ставови. „Сител“ треба да ја врати Кристина на работа – рече Чаусидис.

Чаусидис информираше дека за случајот ќе бидат известени Меѓународната федерација на новинари, организацијата „Репортери без граници“и Европската федерација на новинари.


Гевгелиската болница ги отпушти двајцата анестезиолози


Гевгелија, 26 октомври, 2015 - 20:28 (META) 

Гевгелиската болница донесе решение да ги отпушти двајцата анестезиолози, кои беа дел од тимот што со царски рез ја породуваше родилката која во петокот почина заедно со своето бебе. Анализата на примероците на крв покажа 1,23 промили, односно 1,75 промили алкохол во крвта на анестезиолозите.

„Во врска со немилите случувања кои завршија со смртен исход на родилката и на новороденото, ве известуваме дека управата на ЈЗУ Општа болница Гевгелија врз основа на законот за здравствена заштитита, а по добиените наоди дека има недозволено количество на алкохол во крвта, в.д. директорот на болницата донесе решение за изрекување дисциплинска мерка престанок на вработување на здравствените работници д-р Томчо Ванчев и д-р Зоран Јовановски, специјалисти по анестезиологија и реанимација“, се вели во соопштението од болницата.

Гевгелиската болница е без анестезиолози, а оперативните зафати се препраќаат во штипската и во велешката болница.