Откако денеска „Вистиномер“ објави Скопје ЗОО се убиваат коњи и мазги за прехрана на лавовите, доцна попладнево градоначалничката Данела Арсовска соопшти дека донела одлука за разрешување на директорот на Зоолошката, Кристијан Стаменов.
„По скандалот кој денес ја потресе јавноста разрешен е вршителот на должност директор на Скопската зоолошка градина Кристијан Стаменов“, известуваат од Град Скопје и се оградуваат од индивидуално превземените дејствија на директорот.
„Културна, образовна и научна се основните дејности на ЗОО Скопје, а нејзина основна цел е да ги чува, одгледува и презентира живите експонати и истите да ги направи достапни за пошироката јавност. Личната одлука превземена од страна на директорот не соодветствува со основните заложби за хумано чување и одгледување на животни и за истото мора директорот да понесе одговорност, поради што истиот се разрешува“, гласи соопштението од Град Скопје.
Претходно, „Вистиномер“ објави дека во последниве два дена во Зоолошката градина во Скопје усмртени биле повеќе од 10 коњи и мазги, за да им бидат дадени како храна на месојадните животни.
За тоа посведочија барем тројца вработени во Зоолошката, а информацијата ја потврдил и директорот, Кристијан Стаменов. „Вистиномер“ објави и една од фотографиите на кои се гледа крв на асфалтот во Зоолошката градина како последица на усмртувањето на животните.
