Попов: Србија во Македонија игра во корист на Русија


Белград, 26 септември, 2018 - 13:48 (META) 

Директорот на новосадскиот Центар за регионализам, Александар Попов, денеска изјави дека Србија се однесува обратно од здравиот разум и на испраќа порака во добар правец кога е во прашање претстојниот референдум во Македонија, јавува дописничката на „Мета“ од Белград.

– На Србија како соседна земја, би требало да и биде во интерес да имаме стабилни односи во регионот, а сигурно е дека постигнувањето на договор помеѓу Грција и Македонија е еден значаен чекор во тој правец. Однесувањето на Србија е обратно од здравиот разум, затоа што Србија би требала да се радува на нормализирањето на односите во регионот – изјави Попов за агенцијата „Бета“.

Попов вели дека официјална Србија ја испратила првата „лоша порака“ кога Зоран Заев дошол на власт, затоа што Српската напредна партија (СНС) имала многу добар однос со претходната власт, која ја предводела десничарската ВМРО-ДПМНЕ.

– Очигледно е дека оваа гарнитура во Македонија не и е блиска и не и е по вкус на СНС. За разлика од многу други земји, Србија не го честиташе постигнувањето на договорот помеѓу Ципрас и Заев за името на државата. Потоа, имавме случај кога без објаснување беше повлечен целиот персонал на српската амбасада од Скопје – изјави Попов.

Тој оценува дека е очигледно дека договорот помеѓу Грција и Македонија „ги фрли во сенка“ преговорите помеѓу Белград и Приштина.

– Доколку референдумот во Македонија успее и таа зачекори на сигурен европски пат и на пат кон членство во НАТО, тогаш тоа би било пример за државничко однесува на едната и другата страна, со што на маргините би останала приказната за договорот помеѓу Вучиќ и Тачи. До сега, Вучиќ важеше за шампион на мирот на овие простори во некои меѓународни центри и организации, а сега таа титула би му припаднала на Заев – вели Попов.

Попов вели дека ни најавата за именување на поранешниот шеф на српската тајна служба Раде Булатовиќ за амбасадор во Македонија не е порака во добар правец. Додаде дека не се без основа ни оцените дека Србија во Македонија игра во корист на Русија, на која нe и е во интерес Македонија да стане членка на НАТО. Како уште една димензија на проблемот во односот на Србија спрема Македонија, Попов го наведе и отпорот на Српската православна црква кон автокефалноста на Македонската православна црква додавајќи дека е неприфатлива тоа да се прелева и на меѓудржавните односи.


Иринеј: Вселенскиот патријарх не треба да носи еднострана одлука за МПЦ


Белград, 20 јуни, 2018 - 10:56 (META) 

Српскиот патријарх Иринеј изјави дека би било грешка ако вселенскиот патријарх донесе еднострана одлука за афтокефалност на „канонски непризнаените цркви во Македонија и Украина, бидејќи на тоа би му се спротивставил целиот православен свет“.

-Цариградскиот патријарх е прв меѓу еднаквите, а не прв без еднаквите. Затоа и, не дај Боже, да постои намера на сесветиот патријарх Вартоломеј за некаква еднострана и произволна пресуда во случајот на скопскиот и украинскиот раскол, тоа ќе биде израз на голема заблуда, голема духовна грешка и од аспект на поредокот на православната црква и канонските закони, целосно ништовно – изјави владиката Иринеј за „Политика “.

Тој истакна дека говори целосно хипотетички, бидејќи длабоко верува дека до тоа нема да дојде.

-Доколку до тоа дојде, под политички или други притисоци и поттикнувања, тоа би предизвикало решавачко несогласување и спротивставување, не само во словенскиот православен свет, туку и пошироко во православието – рече Иринеј.


Г.г Стефан: Не бараме ништо повеќе од она што го заслужува нашиот православен народ


Скопје, 5 април, 2018 - 9:59 (META) 

Поглаварот на Македонската православна црква – Охридска архиепископија, г.г. Стефан и Светиот архиерејски синод на МПЦ-ОА во посланието по повод претстојниот празник Воскресение Христово – Велигден истакнуваат дека животот на сите вистински следбеници на Христа е исполнет со искушенија, со духовни падови и подеми – со крст, но и со воскресение.

„Нашиот народ и нашата Охридска и Македонска црква се сведоци за тоа низ сета своја историја. За жал, еве и по 60 години, црковно оправданата постапка на македонскиот православен народ е дочекана со неодобрување, преку селективното и пристрасно разбирање на каноните, кои се толкуваат и применуваат по нечија дневна потреба – се вели во посланието.

Во него се вели дека Црквата и народот не губат надеж и веруваат дека ќе ни се врати местото во сеправославното семејство.

„Затоа, трпеливо молиме, бараме и чукаме на портите од срцата и совеста на нашите православни браќа. А што бараме? Бараме да нè препознаат дека сме тоа што сме биле, чеда на своја вековна Црква, во која исповедаме и живееме „според верата на апостолите и на отците, верата православна – верата што ја утврди вселената“. Не бараме ништо повеќе од тоа што го имал, од тоа што го заслужува, и што му припаѓа на нашиот православен народ. Зашто, со нашата полна црковна самостојност, ќе се збогати и ќе се умножи Црквата Христова. Со тоа и православните браќа и Помесните цркви ќе ја избегнат можноста да паднат во негативните расположби и постапки на своето историско минато“ стои во посланието.


Анкета: 42,6 отсто не ја оправдуваат одлуката на МПЦ-ОА да побара од БПЦ да и биде мајка-црква


Скопје, 13 март, 2018 - 13:02 (META) 

Двете најголеми верски заедници МПЦ-ОА и ИВЗ имаат големо влијание врз политиката, покажува истражувањето „Религија-Политика-Општество: Влијанието на Религијата во Политиката и Општеството” на Фондацијата „Конрад Аденауер“ во соработка со Институтот за Политички истражувања-Скопје и молитвеникот за информации Религија.мк.

Поголемиот дел од анкетираните – 42,6 отсто не ја оправдуваат одлуката на МПЦ-ОА да побара од БПЦ да и биде мајка-црква, додека овој потег на МПЦ го поддржуваат 35,4 отсто од граѓаните.

Високи 89,1 отсто од граѓаните сметаат дека МПЦ-ОА не треба да отстапи од барањето за автокефален статус, а 42,1 процент сметаат дека Српската православна црква (СПЦ) треба да биде првата црква која ќе го признае автокефалниот статус на МПЦ-ОА наспроти 18,6 отсто кои сметаат дека тоа треба да биде бугарската.

На прашањето, дали има и колкаво е влијанието на МПЦ-ОА врз политиката 33 отсто од испитаниците одговориле дека МПЦ-ОА има големо влијание, 32,2 отсто сметаат дека има мало влијание, а дека нема влијание сметаат 26.6 отсто од анкетираните.

Дека ИВЗ има големо влијание врз политиката сметаат 46,2 отсто од граѓаните, 20,3 отсто сметаат дека има мало влијание, а дека нема влијание мислат 21,3 отсто од испитаниците.

Мислењата се поделени на прашањето, дали верски претставници треба да присуствуваат на камен-темелник или отворање на државни објекти, па така резултатите покажуваат дека 47 отсто од граѓаните сметаат дека не треба, а 42,6 отсто сметаат дека треба.

Повеќе од половина од испитаниците – 52,6 отсто сметаат дека црквите и верските заедници треба да бидат повеќе активни во социјалниот живот во општеството, а 27,5 проценти сметаат дека треба да бидат помалку активни.

На прашањето дали покрај државата и верските заедници би требало да отвораат домови за деца без родители или болници за социјално загрозени 81,2 отсто од анкетираните одговориле потврдно а само 10,8 отсто дека не се согласуваат.

Високи 75,9 отсто од граѓаните сметаат дека во Македонија во моментов има доволно верски објекти.

Анкетата била спроведена на национално ниво во текот на месец јануари оваа година на 1.107 испитаници.


Контраспин: Ниту името, ниту „браникот на таковината“ зависат од Агатангел


Скопје, 15 февруари, 2018 - 8:24 (META) 

Две и пол деценискиот спор со Република Грција за името е политички, државен. Владиката Агатангел, се разбира дека може да има став, меѓутоа не може да настапува во име на Македонската православна црква (МПЦ –ОА), а особено не смее да повикува на одбрана на „татковината и на името“ (!), од проста причина што тоа не е црковно прашање. Зачудува и зошто токму сега на владиката му текна дека може да се искине „македонскиот ѓердан бисери“? Не слушнавме таква загриженост кога пред три години опозицијата ги објави прислушуваните разговори, во кои јасно се слуша како претходната власт предводена од ВМРО-ДПМНЕ водела тајни преговори со Грција и дека за македонската страна било прифатливо сложено име при што се споменуваат референци: независна, суверена, демократска и географски одредници, пишува „Вистиномер.мк

Оливера Војновска

Митрополитот Повардарски Агатангел деновиве  (10.02.2018) најнапред преку напис во дневниот весник „Нова Македонија“, а потоа и во уште попрецизна изјава која ја пренесе прилепската регионална телевизија „Канал визија“, испрати спинерска порака во која го повика „македонскиот народ во одбрана на македонското име и на татковината“.

Спин: …Ние сме еден ѓердан македонски и сега некој сака само да земе жилет и да го сецне и бисерите да излетаат да ги снема, бисер да не остане. Но, нема, имаме ние комити тука наши Македонци, имаме браќа што цврсто ќе застанат на браникот на одбрана на нашата татковина Македонија и јас верувам дека тоа ќе се случи. И оние што сакаат туку-така лесно, на многу лесен начин да го дадат името и убедуваат, гледам, некои министри на документарни емисии политички, аналитичари што првпат ги гледаш кога станаа аналитичари не знам, претпоставуваат нешто…. Јас го молам  (народот ) и тоа ми е пораката во излагањето мое во „Нова Македонија“ од саботата и неделата, повик кон целиот македонски народ: Да земеме да си ја сочуваме нашата државата, да застанеме цврсто на браникот на одбраната на татковината, на нашето име, на нашиот македонски јазик, на нашата македонска Црква, на нашата култура, на нашата историја… Можете да замислите сега Бугарите бараат од нас да ја менуваме историјата… Страшно нешто… (од 1,41 до 3,14 минута од видеото)

Затоа, го молам целиот наш македонски народ цврсто да застане на браникот, политичарите да размислат добро што прават, они се пролазни, денеска се утре не се… Но, и вие новинарите, чувајте ја, бранете ја, сакајте ја од длабочината на вашето срце и верувајте ми ќе бидеме најбогат народ (од 5, 30 до 6,03 минута од видеото)

[Извор: „Нова Македонија,  датум: 10.02.2018]

[Извор: „Канал визија“ ФБ страница, датум: 12.02.2018]

 

Контраспин: Ваквиот настап на владиката Агатангел, во кој ја обвинува власта дека има нечесни намери да го смени името на државата и го повикува македонскиот народ да „застане цврсто на браникот на одбрана на татковината“ , воопшто не приличи за едно свештено лице и претставува политички спин.

Kontraspin-foto-Vistinomer-1024x281-e1500652724996

Самиот настап  на митрополитот Повардарски е прилично проблематичен, со оглед на фактот што тој се стави во улога на политичар и се замеша во работи кои се надвор од ингеренциите на Црквата. Според Уставот, Македонија е секуларна држава и верските заедници не треба да се мешаат во нејзината работа. Уставот ја „гарантира слободата на вероисповеста“но истовремено во член 19, став 3 прецизно кажува дека:

Македонската православна црква, другите верски заедници и религиозни групи се одвоени од државата и се еднакви пред законот.

Две и пол деценискиот спор со Република Грција за името е политички, државен. Владиката Агатангел, се разбира, може да има став, меѓутоа не може да настапува во име на Македонската православна црква – Охридска архиепископија (МПЦ –ОА), а особено не смее да повикува на некаква одбрана на „татковината и на името“ (!), од проста причина што тоа не е црковно прашање.

Впрочем, тоа денеска го кажа и потпаролот на МПЦ-ОА, Тимотеј, кој во изјава  за „Макфакс“ вели дека секој има право на свое мислење, но потенцира доколку владиката Агатангел навистина изјавил такво нешто, тоа не е став на Синодот, ниту на Црквата.

Не го видов, не знам за што станува збор. На Црквата не ѝ е работа да се занимава со востанија. Таа треба да се грижи за духовниот живот на верниците, а не да се занимава со дневнополитички прашања и партиски престрелкивели Тимотеј за „Макфакс“.

Во однос на името, сигурно дека ниту еден Македонец не сака да му се менува името, но тоа не е наша работа. Ако тоа не задира во идентитетот и јазикот, тоа е оценка за оние што се платени за тоа. Впрочем, сите ќе може да се изјаснат, бидејќи тоа прашање ќе оди на референдум. Наше е да шириме мир, љубов и разбирање меѓу луѓето, а не да работиме на нивно разидување“, додава владиката Тимотеј.

Од друга страна, зачудува зошто токму сега на владиката Агатангел му текна дека „ние сме еден ѓердан македонски и сега некој сака само да земе  жилет и да го сецне и бисерите да излетаат да ги снема, бисер да не остане“, па го повикува народот да застане на браникот на татковината“ :

…Имаме ние  комити тука наши Македонци, имаме браќа што цврсто ќе застанат на браникот на одбрана на нашата татковина Македонија и јас верувам дека тоа ќе се случи.

Не слушнавме од Агатангел вакви патриотски повици кога пред три години (мај 2015) опозицијата ги објави прислушуваните разговори, во кои јасно се слуша како претходната власт предводена од ВМРО-ДПМНЕ водела тајни преговори со Грција за спорот името, дека за македонската страна било прифатливо сложено име при што се споменуваат референци: независна, суверена демократска…, како и географски одредници.

Исто така, несфатливо е како може еден великодостојник, од кој се очекува да проповеда милост, почит и љубов меѓу верниците, да си дозволи да говори со гнев , па дури и со омраза, како што тоа го прави Агатангел (во текстот објавен во „Нова Македонија“) кон актуелните политички личности кои ги водат преговорите. Иако тој не споменува конкретни имиња, сепак, може да се препознае на кого милси Агатангел кога вели „нечестивиот“ и кои лица имаат „нечесни намери“, па поради тоа ќе „завршат на ѓубриштето на историјата“:

Пред нас е исправен нечестивиот со неговите поделби и немири. Без наше учество во неговото недело, неговите намери се безвредни, а неговата сила е бессилна и хаотична. Неговата намера е јасна, а неговите постапки се очигледни. Ни се предлага безумство и нечуена лудост. Не само што сме присилени да се самоукинеме како македонски народ, туку треба и да им бидеме благодарни за тоа на новите кумови… 

Имаме шанса, драги мои, да ги посрамиме сите оние што имаат задни и нечесни намери. Нашето одлучно „не!“ на нивните предлози се нивниот најголем пораз. Нашата решителност и одважност за националните прашања силно ќе одекнат во светот. Преку нив ќе си го зачуваме образот и ќе го надградиме нашиот углед. Не постои власт во светот што може да оди против својот народ. Оној што се обидел да оди спротивно од народните потреби и интереси неславно и во срам завршува на ѓубриштето на историјата

И, за жал, токму пелинот што извира од тонот, со кој на ваков начин Агатангел се обраќа до неговите „драги Македонци“, се заканува да ги искине бисерите од македонскиот ѓердан, за кој, наводно, толку многу е загрижен.


Патријархoт Неофит: Имаме консензус со МПЦ-ОА за главните прашања


Софија, 21 јануари, 2018 - 10:53 (META) 

Имаме консензус за главните прашања на претстоечкото единство. Ова за БГНЕС го изјави патријархот Неофит одговарајќи на прашањето што може да се очекува во блиска иднина во однос на приближувањето меѓу Бугарската православна црква и Македонската православна црква-Охридска архиепископија.

-Претстојат интензивни средби и разговори. Се обидуваме да се ислушаме со внимание, да го одржиме добриот тон, да се сретнеме со архиереите и со луѓето од кои зависи придвижувањето на ова прашање. Фала му на Бога дека имаме консензус за главните прашања на претстоечкото единство – истакна бугарскиот патријарх.

Патријархот Неофит на 7 јануари се сретна со вселенскиот патријарх Вартоломеј, со кој отслужија литургија во обновениот храм „Свети Стефан” во Истанбул.

Потоа, двајцата духовни водачи имале разговори, на кои се отворила и темата за автокефалноста на МПЦ-ОА.


Џафери: Божиќ нека биде поттик за остварување на слободата и праведноста


Скопје, 7 јануари, 2018 - 11:09 (META) 

Претседателот на Собранието, Талат Џафери на сите верници од православна вероисповед, на членовите на Светиот архијерејски синод и до целото свештенство и монаштво, упати честитки по повод големиот христијански празник Божиќ.

„Најсветиот христијански празник, Христовото раѓање – Божиќ е празник кога се негуваат убави мисли и дела, посебно спрема најближните и кон оние на кои таквата љубов и поддршка им е најпотребна. Верувам дека Македонската православна црква како најголема христијанска заедница во Македонија и во иднина ќе ја исполнува својата улога во нашето општество, ширејќи ја пораката за љубов, простување, помирување и за сплотување. Затоа, нека овие денови бидат поттик за остварување на вредностите кон кои сите заеднички се стремиме, а тоа се слободата, еднаквоста и праведноста“, се вели во честитката на Џафери.


Иринеј: Зад договорот помеѓу БПЦ и МПЦ стои политичка позадина


Белград, 3 јануари, 2018 - 18:11 (META) 

Зад односите меѓу БПЦ и МПЦ има политичка позадина вели српскиот патријарх Иринеј во интервју за весникот „Печат“. За новонастанатата ситуација со Бугарската православна црква, чиј Синод ја прифати улогата на мајка црква на македонската црква со што таа би обидела да стекне легалност и автокефалност, Иринеј вели дека се работи за чиста фарса.

Во интервјуто тој наведува дека ова е сценарио кое се режирало во Струмица на последниот состанок на двајцата премиери Зоран Заев и Бојко Борисов, а потегот на МПЦ го оценува како неук.

-Актерите и не кријат многу, дека нивните акции се политички координирани. Притоа, нив, се разбира, Црквата со своите канони, устројство и поредок, совршено не ги интересира. Нивната намера е чисто црковниот проблем да го решат со политичко насилство и со политичка цел. Проблемите нема да се решат со политичките договори на двоецот Борисов – Заев, и со неуката акробатика на поедини архиереји, кои инаку искрено и длабоко ги жалам – вели Иринеј.


Грчката црква „се моли“ сестринската БПЦ да не и биде „мајка црква“ на МПЦ


Атина, 16 декември, 2017 - 12:04 (META) 

Светиот aрхиерејски синод на грчката црква на завчерашното заседание ја разгледал одлуката на БПЦ да го прифати барањето, како што се вели во соопштението, „на расколничката црква“ да ја преземе улога на нејзина „мајка црква“.

„По тој повод, Светиот синод ја изразува својата загриженост, заради фактот на мешање, со таа одлука, на Бугарската православна црква во јурисдикцијата на друга православна црква, т.е. на Српската православна црква, чин, којшто е спротивен на светите канони и на Преданието на црквата, со што ги превидува канонското право и водечката улога на Вселенската патријаршија, што може да биде почеток на немили собитија“, се вели во соопштението.

Светиот архерејски синод на грчката црква наведува дека „се моли да преовладее совеста и одлуката на сестринска Бугарска православна црква конечно да не се спроведе“.


Г.г. Стефан: Мора да сфатиме дека работите треба да се решаваат низ дијалог


Скопје, 7 декември, 2017 - 22:04 (META) 

„За нашиот верен народ и за нашата независна држава, сè уште останува еден од проблемите – тоа што Македонската православна црква (МПЦ) е неприфатена во сеправославното семејство, за жал, од политички причини. Па, Охрид и Црквата во Македонија ниту ги измисливме, ниту се создадени за штета на другите, туку за слава на Бога и за спасение на нашиот богољубив народ. Само така и единствено на тој начин треба да се сфатат последните, актуелни напори на Светиот архиерејски синод во решавањето на овој нелогичен и нецрковен проблем, поврзан со статусот на нашата Црква“.

Ова го истакна поглаварот на Македонската православна црква г.г. Стефан во своето обраќање на свечената академија во пресрет на утрешниот државен празник Свети Климент Охридски, што вечерва се одржа во Македонскиот народен театар (МНТ), под покровителство на премиерот Зоран Заев.

Иако не го спомена директно, станува збор за прва јавна изјава на поглаварот на МПЦ во врска со прифатеното барање Бугарската православна црква да ѝ биде мајка црква на МПЦ.

Според г.г. Стефан, покажаната иницијатива е во духот на љубовта кон својот народ и сето православие.

– Кој се обидува да ги решава проблемите на својот народ, тој покажува и преданост, и почит и дело на родољубивост. Ние мора да сфатиме дека работите треба да се решаваат низ дијалог, во кој ќе ги штитиме своите интереси и потреби, наоѓајќи ги најприфатливите за нас решенија – рече поглаварот на МПЦ.

Премиерот Зоран Заев во своето обраќање го честиташе 50-годишниот јубилеј од возобновувањето на автокефалноста на Охридската архиепископија во лицето на Македонската православна црква и истакна оти е убеден дека овој јубилеј ќе отвори и „надминување на повеќегодишните предизвици исправени пред МПЦ, која е реалност во православниот свет“.

– Како што успеал свети Климент во мисијата на неговото време, повикани сме да се обидеме и да успееме и ние, надминувајќи ги предизвиците трпеливо и мудро, како што ни доликува, заштитувајќи ги идентитетските вредности како граѓани, како народ и како држава – рече Заев.

На свечената академија присуствуваа високи претставници на МПЦ, пратеници, претставници на Владата, на амбасадите, професори, академици, претставници на верските заедници, на бизнис-заедницата и други гости.